भरणे जॅकवेल व भोरज धरणातील मर्यादित साठ्यामुळे जानेवारीनंतर पाणीपुरवठ्यावर परिणाम होण्याची शक्यता; दुरुस्तीचे काम हाती घेणार
खेड (रत्नागिरी):
Khed Water Supply Planning अंतर्गत आगामी उन्हाळ्यातील संभाव्य पाणीटंचाईवर मात करण्यासाठी खेड नगर परिषदेने विविध उपाययोजनांचे नियोजन केले आहे. मंगळवारी आयोजित नगर परिषदेच्या विशेष पाणी नियोजन बैठकीत टँकरद्वारे पाणीपुरवठा, नादुरुस्त विहिरी व बोअरवेलची दुरुस्ती, मुख्य जलवाहिन्यांमधील गळती रोखणे आणि पर्यायी पाणीस्रोतांचा प्रभावी वापर यावर भर देण्याचा महत्त्वपूर्ण निर्णय घेण्यात आला.
पाणीपुरवठा व जलनिस्सारण समितीचे सभापती तथा उपनगराध्यक्ष सतीश चिकणे यांनी बैठकीत विविध उपाययोजनांची सविस्तर माहिती दिली. खेड शहराला भरणे जॅकवेल व भोरज धरणातून मुख्यत्वे पाणीपुरवठा केला जातो. मात्र, धरणातील मर्यादित पाणीसाठा व मुख्य जलवाहिनीच्या दुरुस्तीची तातडीची गरज लक्षात घेता जानेवारीनंतर शहर पाणीपुरवठ्यावर काही प्रमाणात परिणाम होण्याची शक्यता आहे. भोरज धरणाच्या जलवाहिनीचा जगबुडी नदीपात्रातील खराब झालेला भाग तातडीने दुरुस्त करण्यात येणार असून हे काम पूर्ण झाल्यावर मार्च-एप्रिलदरम्यान पाणीपुरवठा सुरळीत होण्यास मदत होईल, असे सतीश चिकणे यांनी स्पष्ट केले.
Khed Water Supply Planning: अमृत २.० योजना आणि टँकरचे नियोजन
पाणीटंचाईच्या काळात नागरिकांची गैरसोय टाळण्यासाठी नगर परिषदेकडे सध्या स्वतःचा एक व भाडेतत्त्वावरील एक असे दोन टँकर उपलब्ध आहेत. परिस्थितीनुसार आणखी चार ते पाच टँकर उपलब्ध करून देण्याचे नियोजन करण्यात आले आहे. याशिवाय ‘अमृत २.०’ योजनेतून ६ दशलक्ष लिटर पाणीसाठा आरक्षित असून, नातूनगर येथून जलशुद्धीकरण केंद्रापर्यंत गुरुत्व वाहिनीने (Gravity Pipeline) पाणी आणण्याचे काम प्रस्तावित आहे.
तसेच शहरातील सर्व सार्वजनिक विहिरींची साफसफाई करणे, नादुरुस्त बोअरवेलची डागडुजी करणे आणि जलवाहिन्यांमधील पाणी गळती शोधून ती तात्काळ रोखणे यावर प्राधान्याने काम केले जाणार आहे. या बैठकीला नगराध्यक्षा माधवी बुटाला, मुख्याधिकारी महादेव रोडगे यांच्यासह नगर परिषदेचे अधिकारी व कर्मचारी उपस्थित होते.
