राज्यपाल जिष्णू देव वर्मा यांच्या हस्ते राजभवनात गौरव; शंभरहून अधिक ग्रामीण महिला व हजारो शेतकऱ्यांना मिळवून दिला सन्मानजनक रोजगार
Dalvi Cashew Khadi Gramodyog Bharari Award: काजूगर निर्मितीच्या माध्यमातून रत्नागिरी जिल्ह्यातील शेकडो ग्रामीण महिलांना आणि काजू बी उत्पादक शेतकऱ्यांना कायमस्वरूपी व सन्मानजनक रोजगार मिळवून देणारे रत्नागिरीतील ‘दळवी कॅश्यू’चे मालक श्री. संदेश परशुराम दळवी यांना महाराष्ट्र शासनाचा ‘खादी ग्रामोद्योग भरारी पुरस्कार’ प्रदान करून सन्मानित करण्यात आले आहे.
मुंबई येथील राजभवन येथे पार पडलेल्या दिमाखदार सोहळ्यात राज्याचे राज्यपाल श्री. जिष्णू देव वर्मा यांच्या हस्ते संदेश दळवी यांना हा पुरस्कार सोपवण्यात आला. या प्रसंगी राज्याचे उद्योगमंत्री डॉ. उदय सामंत आणि राज्य खादी ग्रामोद्योग मंडळाचे सभापती रवींद्र साठे यांची विशेष उपस्थिती होती. सन्मानचिन्ह आणि रोख रक्कम असे या पुरस्काराचे स्वरूप आहे. ग्रामीण भागातील महिलांना व शेतकऱ्यांना स्वावलंबी बनवण्यासाठी त्यांनी केलेल्या अतुलनीय कार्याचे राज्यपालांनी कौतुक केले.
अवघ्या ५ महिलांपासून सुरू झालेला यशस्वी प्रवास
ग्रामीण भागातील महिलांना स्वतःच्या हक्काचा रोजगार मिळावा व त्यांनी कुटुंबाला आर्थिक हातभार लावावा, या उदात्त हेतूने संदेश दळवी यांनी २०१० मध्ये संगमेश्वर तालुक्यातील घोडवली या गावी काजूगर प्रक्रिया उद्योगाची मुहूर्तमेढ रोवली होती. या वाटचालीत त्यांना त्यांच्या धर्मपत्नी सौ. श्रद्धा दळवी यांची मोलाची साथ लाभली.
सुरुवातीला केवळ ५ महिला सहकाऱ्यांना सोबत घेऊन श्री. व सौ. दळवी यांनी अत्यंत छोट्या प्रमाणावर काजू व्यवसायाची सुरुवात केली होती. आज त्यांच्या या उद्योगाने वटवृक्षाचे रूप धारण केले असून:
प्रत्यक्ष रोजगार: ११५ ग्रामीण महिलांना दळवी कॅश्यूमध्ये थेट रोजगार मिळाला आहे.
अप्रत्यक्ष रोजगार: जिल्ह्यातील सुमारे १,२०० काजू बी उत्पादक शेतकऱ्यांना कायमस्वरूपी हक्काची बाजारपेठ व अप्रत्यक्ष रोजगार उपलब्ध झाला आहे.
शून्यातून निर्माण केलेल्या या उद्योगविश्वामुळे दळवी दांपत्याने रत्नागिरीच्या ग्रामीण भागातील सामाजिक आणि आर्थिक चित्रात मोठा सकारात्मक बदल घडवून आणला आहे.
