आंदोलन संपल्याच्या चर्चांवर सहसंस्थापक आशुतोष रांका यांचे उत्तर; ‘आम्ही थंड पडणार नाही, जमिनीवरच आहोत’ असा दावा
CJP Gyanesh Kumar Protest संदर्भात दिवाळीपूर्वी देशाचे मुख्य निवडणूक आयुक्त ज्ञानेश कुमार यांच्याविरोधात कॉकरोच जनता पार्टीकडून (सीजेपी) आक्रमक आंदोलने करण्यात आली होती. ज्ञानेश कुमार यांचा राजीनामा घेतल्याशिवाय स्वस्थ बसणार नाही, अशी भूमिका सीजेपीने घेतली होती. मात्र, गेल्या काही दिवसांपासून सीजेपी शांत झाल्याचे दिसत असून, दिवाळी संपल्यानंतरही ज्ञानेश कुमार यांच्या मुद्द्यावर भाष्य होत नसल्याने आंदोलन संपले का, असा प्रश्न उपस्थित केला जात आहे.
अभिजीत दीपके, सौरभ दास आणि आशुतोष रांका हे सोशल मीडियावर ज्ञानेश कुमार यांचे नावही घेत नसून पुन्हा ‘स्कूल ठीक करो’ अभियानात गुंतल्याचे दिसत आहे. या पार्श्वभूमीवर सीजेपीचे सहसंस्थापक आशुतोष रांका यांनी वरिष्ठ पत्रकार अजित अंजुम यांच्या यूट्यूब चॅनलला दिलेल्या मुलाखतीत या प्रश्नांवर उत्तर दिले आहे.
CJP Gyanesh Kumar Protest वर आशुतोष रांका यांचे मुद्दे
आशुतोष रांका यांनी सीजेपीच्या भूमिकेबाबत आणि आगामी नियोजनाबाबत पुढील बाबी स्पष्ट केल्या आहेत:

आंदोलन व दौरे: पुढच्या वेळी रस्त्यावर उतरून कधी आंदोलन करणार याबाबत त्यांनी स्पष्ट तारीख सांगितली नाही, मात्र "देशात थंडी आलीय पण आम्ही थंड पडणार नाही. मी हरियाणा दौऱ्यावर होतो, सौरभ दिल्ली दौऱ्यावर होता आणि त्याने यूपीच्या शाळांचा दौरा केला, तर दीपके कोचीच्या दौऱ्यावरून आलाय. आम्ही जमिनीवरच आहोत," असे ते म्हणाले.
SIR आणि मताधिकाराचा मुद्दा: एकाच वेळी दोन-तीन गोष्टींवर लक्ष असून SIR च्या मुद्द्यावर काम सुरू असल्याचे त्यांनी सांगितले. जिथे जातात, तिथे लोकांचा मताधिकार कसा हिरावला गेला, हे लोकांकडून समजून घेत असल्याचे रांका यांनी नमूद केले.
दिवाळीचा ब्रेक: काही दिवसांपूर्वी दिवाळी साजरी केल्याचे आणि बऱ्याच काळानंतर कुटुंबासोबत वेळ घालवल्याचे सांगत, आता पुन्हा जमिनीवर उतरल्याचे त्यांनी स्पष्ट केले.
"मग प्रश्न फक्त सीजेपीलाच का?"
ज्ञानेश कुमार यांच्या राजीनाम्याची आता आवश्यकता नाही का आणि सर्वकाही चांगले चालले आहे का, या प्रश्नावर आशुतोष रांका यांनी प्रतिप्रश्न केला. "त्या लॉजिकने तर सगळा देशच थंड पडलाय. मग थंड पडण्याचा प्रश्न फक्त सीजेपीला का विचारला जातोय?" असा सवाल त्यांनी उपस्थित केला.
सीजेपीने सातत्याने आंदोलने केल्याचे, ताब्यात घेतले गेल्याचे व अटक झाल्याचे सांगत ते म्हणाले की, दिवाळीच्या एक दिवस आधी कोच्चीमध्ये सभा झाली असून, यापुढे हरियाणा, दिल्ली, यूपी आणि पाटणा येथे जाण्याचे नियोजन आहे. मध्ये १५ दिवसांचा ब्रेक घेतल्यानंतर सर्वच शांत असताना हा प्रश्न केवळ सीजेपीलाच का विचारला जातो, अशी विचारणा त्यांनी केली.













