खेड : रत्नागिरी जिल्ह्यातील खेड तालुक्यात मुंबई-गोवा महामार्ग क्रमांक ६६ वरील भोस्ते घाटात रविवारी सकाळी १०.४५ वाजण्याच्या सुमारास भीषण अपघात घडला. या अपघातात टँकर चालकाच्या निष्काळजीपणामुळे चार वाहनांना धडक बसली, ज्यामुळे चार जण जखमी झाले आणि वाहनांचं मोठ्या प्रमाणात नुकसान झालं. या प्रकरणी खेड पोलिसांनी टँकर चालकाविरुद्ध गुन्हा दाखल केला आहे.
फिर्यादी वैभव शिवाजी सुर्वे (वय ४०, व्यवसाय नोकरी) हे ठाण्यातील वृंदावन सोसायटीत राहतात आणि त्यांचं मूळ गाव कोकरे वाघशिबीवाडी (ता. चिपळूण, जि. रत्नागिरी) आहे. रविवारी सकाळी ते आपल्या इर्टीगा गाडी (क्रमांक MH 04 KD 1339) मधून कुटुंबासह चिपळूणहून ठाण्याकडे निघाले होते. भोस्ते घाटात उतरत असताना गतीरोधकाजवळ (स्पीड ब्रेकर) त्यांनी गाडीचा वेग कमी केला. याचवेळी त्यांच्या मागून येणाऱ्या टँकरने (क्रमांक KA 28 AA 2818) भरधाव वेगात धडक दिली.
टँकर चालक राजेश्वर शनप्पा मंगलगी (वय २६, रा. गुब्बेवाड, ता. सिंदगी, जि. बिजापूर, कर्नाटक) याने रस्त्याच्या परिस्थितीकडे दुर्लक्ष करत निष्काळजीपणे आणि बेदरकारपणे वाहन चालवल्याचा आरोप आहे. टँकरने प्रथम वैभव सुर्वे यांच्या इर्टीगा गाडीला डाव्या बाजूने जोरदार धडक दिली. त्यानंतर टँकरने रस्त्याच्या डाव्या बाजूला उभ्या असलेल्या ट्रकला (क्रमांक GJ 37 T 6679) आणि पुढे जाणाऱ्या मोटरसायकलला (क्रमांक MH 08 AM 5167) धडक दिली. या साखळी अपघातामुळे मोठी हानी झाली.
चार प्रवासी जखमी
या अपघातात इर्टीगा गाडीतील चार प्रवासी जखमी झाले. त्यामध्ये जागृती सुर्वे, शोभा संदानंद कदम, संस्कृती संतोष कदम आणि मयुरेश कदम यांचा समावेश आहे. सर्व जखमी हे ठाण्यातील वृंदावन सोसायटीचे रहिवासी असून, त्यांचं मूळ गाव कोकरे वाघशिबीवाडी आहे. जखमींना किरकोळ दुखापती झाल्या असून, त्यांच्यावर स्थानिक रुग्णालयात उपचार सुरू आहेत. तसेच, या अपघातात चारही वाहनांचं मोठ्या प्रमाणात नुकसान झालं आहे.
पोलिसांत गुन्हा दाखल
या घटनेची तक्रार वैभव सुर्वे यांनी खेड पोलीस ठाण्यात नोंदवली. त्यांच्या फिर्यादीवरून आज दुपारी ४.०३ वाजता भारतीय न्यायसंहिता अधिनियम २०२३ च्या कलम २८१, १२५(ए) आणि मोटार वाहन कायदा कलम १८४ अंतर्गत गुन्हा दाखल करण्यात आला. गुन्हा क्रमांक ८७/२०२५ असा नोंदवण्यात आलेला हा गुन्हा टँकर चालक राजेश्वर मंगलगी याच्याविरुद्ध आहे.
स्थानिकांची नाराजी
भोस्ते घाटात वारंवार होणाऱ्या अपघातांमुळे स्थानिकांमध्ये नाराजी पसरली आहे. “हा घाट धोकादायक आहे आणि तरीही काही चालक नियम पाळत नाहीत. या घाटातील मोठे वळण काढणे आवश्यक आहे शिवाय गतीरोधकांची संख्या वाढवावी,” अशी मागणी स्थानिकांनी केली आहे. या अपघातामुळे महामार्गावरील सुरक्षेचा प्रश्न पुन्हा एकदा ऐरणीवर आला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:24 24-03-2025
