चिपळूण : मुंबई-गोवा राष्ट्रीय महामार्गावरील बहादूरशेखनाका येथे उड्डाणपुलाच्या कामाला गती आली असून, जानेवारी २०२६ पूर्वी हे काम पूर्ण करण्यासाठी प्रयत्न सुरू आहेत. सध्या जुने पिअर तोडण्याचे काम पूर्ण झाले आहे. आता नवीन पिअर कॅप उभारण्याच्या कामाला वेग आला आहे. शनिवारी चिपळूण दौऱ्यावर आलेले आ. निलेश राणे यांनीही याबाबत महामार्ग अधिकाऱ्यांना सक्त सूचना दिल्या होत्या.
पेढे-परशुराम ते खेरशेत या ३४ किलोमीटर दरम्यान चौपदरीकरणातील चिपळूण टप्प्यात बहादूरशेख नाका ते प्रांत कार्यालयापर्यंत उड्डाणपूल उभारण्यात येत आहे. बहादूरशेखनाका येथून या पुलाचे काम पावसाळ्यात सुरू केले.
मात्र, १६ ऑक्टोबर २०२३ रोजी या पुलाचा काही भाग कोसळला होता. त्यावेळी या कामातील काही त्रुटी समोर आल्या होत्या. त्यानंतर तत्काळ पुलाचा आराखडा बदलण्यात आला होता. सध्या पूल उभारणीत ४० मीटरच्या गाळ्यांचे अंतर कमी करून ते आता २० मीटरवर ठेवले आहे. त्यासाठी तिथे अतिरिक्त पिअर उभारण्यात आले आहेत. पिअर कॅप उभारण्याचे काम युद्धपातळीवर सुरू असून, एकूण ९५ पिअर कॅपपैकी अर्ध्याहून अधिक पिअर कॅपचे काम पूर्ण केले आहे.
त्यासाठी तीन टीम काम करत आहेत. आता उर्वरित पिअर कॅपवर गर्डर चढविण्यासाठी दोन क्रेन मागविण्यात आले असून, त्याआधारे महिनाभरात ३२ गर्डर चढविण्यात आले. अजूनही उर्वरित कामासाठी किमान नऊ महिन्यांचा कालावधी लागणार असल्याने जानेवारी २०२६ पर्यंत हे काम पूर्ण होईल, असे राष्ट्रीय महामार्ग विभागाकडून सांगण्यात आले आहे.
या पुलाची लांबी १,८४० मीटर तर रुंदी ४५ मीटर आहे. ४६ पिलर पुलासाठी उभारण्यात आले असून, हा पूल कोकणातील महामार्गावरील सर्वाधिक लांबीचा ठरला आहे. शनिवारी रत्नागिरी दौऱ्यावर आलेल्या आ. निलेश राणे यांनीहि महामार्ग अधिकाऱ्यांना बोलावून महामार्गाच्या कामाचा आढावा घेतला. बहादूरशेख नाका येथील ओव्हर ब्रिजचे काम, परशुराम घाटातील रस्ता खचण्याच्या घटना यासह संगमेश्वर तालुक्यातील संथ गतीने सुरू असलेल्या कामाला त्वरित गती द्यावी व कार्यवाही करावी अशा सूचना त्यांनी अधिकाऱ्यांना केल्या आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
03:46 PM 01/Apr/2025
