मुंबई, दि. १३ (रानिआ) : राज्यातील नगरपरिषदा आणि नगरपंचायतींच्या आगामी निवडणुकांसाठी (Nagar Parishad Election 2025) उमेदवारी अर्ज भरण्याच्या प्रक्रियेबाबत राज्य निवडणूक आयोगाने (State Election Commission) एक अत्यंत महत्त्वाचे स्पष्टीकरण दिले आहे. उमेदवारांनी ऑनलाइन अर्ज भरताना संकेतस्थळावर (Website) फक्त नामनिर्देशनपत्र व शपथपत्रातील माहिती भरणे आवश्यक आहे. त्यासोबत कोणतीही कागदपत्रे सादर (Upload) करण्याची आवश्यकता नाही, असे आयोगाने ठामपणे स्पष्ट केले आहे.
ऑनलाइन अर्ज भरण्याची नेमकी प्रक्रिया काय?
राज्यातील २४६ नगरपरिषदा व ४२ नगरपंचायतींच्या सदस्यपदासाठी आणि थेट अध्यक्षपदाच्या सार्वत्रिक निवडणुकांकरिता नामनिर्देशपत्र दाखल करण्यास सुरुवात झाली आहे. यासाठी राज्य निवडणूक आयोगाने https://mahasecelec.in हे विशेष संकेतस्थळ विकसित केले आहे.
आयोगाने स्पष्ट केलेली प्रक्रिया खालीलप्रमाणे:
- ऑनलाइन नोंदणी व माहिती भरणे: उमेदवारांना प्रथम या संकेतस्थळावर नोंदणी करून नामनिर्देशनपत्र आणि शपथपत्रातील सर्व माहिती ऑनलाइन भरायची आहे.
- प्रिंटआऊट घेणे: संपूर्ण माहिती भरल्यानंतर, भरलेल्या अर्जाची आणि शपथपत्राची छापील प्रत (Print Out) घ्यायची आहे.
- सही करणे: या छापील प्रतीवर उमेदवाराने स्वतःची व सूचकांची स्वाक्षरी करणे बंधनकारक आहे.
- भौतिक कागदपत्रे जोडणे: या प्रिंटआऊटसोबत इतर सर्व आवश्यक कागदपत्रांच्या मूळ प्रती जोडायच्या आहेत. (उदा. नगरपरिषद/नगरपंचायतीचे नादेय प्रमाणपत्र, शौचालय वापराबाबतचे प्रमाणपत्र किंवा स्वयंघोषणापत्र, निवडणुकीसाठीच्या बँक खात्याचा तपशील, राखीव जागेवरील उमेदवार असल्यास जातप्रमाणपत्र, पक्षाचा अधिकृत उमेदवार असल्यास ‘जोडपत्र- १’ किंवा ‘जोडपत्र- २’ इत्यादी.)
- प्रत्यक्ष संच जमा करणे: हा संपूर्ण संच (प्रिंटआऊट + सर्व मूळ कागदपत्रे) विहित मुदतीत संबंधित निवडणूक निर्णय अधिकाऱ्याकडे प्रत्यक्ष (Physically) जमा करणे बंधनकारक आहे.
उमेदवारांनो, या तारखा आणि वेळा लक्षात ठेवा!
- ऑनलाइन नोंदणीची अंतिम वेळ: इच्छूक उमेदवारांना नोंदणी करण्यासाठी हे संकेतस्थळ १७ नोव्हेंबर २०२५ रोजी दुपारी २ वाजेपर्यंत (२४ तास) सुरू राहील. उमेदवारांनी नोंदणी करताना तयार केलेला लॉगीन आयडी व पासवर्ड जपून ठेवावा.
- अर्ज प्रत्यक्ष जमा करण्याची अंतिम मुदत: सही केलेल्या प्रिंटआऊटसह आवश्यक त्या संपूर्ण कागदपत्रांचा संच संबंधित निवडणूक निर्णय अधिकाऱ्याला विहित मुदतीत, म्हणजेच १७ नोव्हेंबर २०२५ रोजी दुपारी ३ वाजेपर्यंत सादर करणे आवश्यक आहे.
सुट्टीच्या दिवशीही अर्ज स्वीकारणार
उमेदवारांची गैरसोय होऊ नये, यासाठी राज्य निवडणूक आयोगाने विशेष सूचना दिल्या आहेत:
- शनिवार, १५ नोव्हेंबर (सुट्टी): सुट्टीचा दिवस असूनही, उमेदवारांचे नामनिर्देशनपत्र स्वीकारण्यात यावेत, अशा सूचना सर्व निवडणूक निर्णय अधिकाऱ्यांना देण्यात आल्या आहेत.
- रविवार, १६ नोव्हेंबर: मात्र, रविवारी अर्ज स्वीकारण्यात येणार नाहीत.
इच्छूक उमेदवारांना आवश्यक ती कागदपत्रे (उदा. नादेय प्रमाणपत्र) वेळेत उपलब्ध करून देण्याचे निर्देश सर्व नगरपरिषदा व नगरपंचायतींना देण्यात आले आहेत, असेही राज्य निवडणूक आयोगाने प्रसिद्धिपत्रकाद्वारे कळविले आहे.
