फिनिश लाईनवर ‘उकडीचा मोदक’ आणि ‘आंब्याच्या आकाराचे मेडल’
रत्नागिरी : दरवर्षीप्रमाणे यंदाही नवीन वर्षाच्या पहिल्या रविवारी, म्हणजेच ४ जानेवारी २०२६ रोजी रत्नागिरी शहर पुन्हा एकदा ‘धावनगरी’ होणार आहे. सुवर्णसूर्य फाऊंडेशनच्या वतीने आयोजित ‘कोकण कोस्टल हाफ मॅरेथॉन’साठी संपूर्ण देश सज्ज झाला असून, तब्बल १२ राज्यांमधून आणि ३०० हून अधिक शहरांतून २२०० पेक्षा जास्त ‘फिटनेस टुरिस्ट’ रत्नागिरीत दाखल होणार आहेत. हॉटेल सी फॅन्स येथे झालेल्या पत्रकार परिषदेत ही माहिती देण्यात आली.
मराठी भाषेला समर्पित पहिलीच मॅरेथॉन
आजवर जगात कोणत्याही भाषेसाठी मॅरेथॉन समर्पित केली गेली नव्हती, मात्र सुवर्णसूर्य फाऊंडेशनने हे शिवधनुष्य पेलले आहे. ही मॅरेथॉन पूर्णपणे ‘मराठी’ भाषेला समर्पित असेल. या स्पर्धेत जास्तीत जास्त मराठी संज्ञांचा वापर केला जाणार असून, जिथे अत्यावश्यक आहे तिथेच इंग्रजीचा वापर होईल, अशी माहिती फाऊंडेशनचे संचालक प्रसाद देवस्थळी यांनी दिली.
मॅरेथॉनची खास वैशिष्ट्ये:
२१ किमीचा वन-वे मार्ग: ९ गावांमधून जाणारा आणि कोकणची जैवविविधता दर्शवणारा निसर्गरम्य मार्ग.
आकर्षक बक्षिसे: प्रत्येक फिनिशरला ‘आंब्याच्या आकाराचे मेडल’.
कोकणी पाहुणचार: शर्यत पूर्ण झाल्यावर समुद्रकिनारी मिळणारा गरमागरम ‘उकडीचा मोदक’.
संगीत आणि उत्साह: अंकिता पाटकर यांच्या टीमचे झुंबा सेशन आणि आयपॉपस्टार फेम राधिका भिडे यांनी कंपोज केलेले विशेष गाणे (Anthem).
व्हिजन २०४७ : कोकणाच्या अर्थकारणाला गती
सुवर्णसूर्य फाऊंडेशन ‘व्हिजन २०४७’ वर काम करत आहे. पुढील २२ वर्षांत फिटनेस टुरिझमच्या माध्यमातून १ कोटी पर्यटक कोकणात आणणे आणि त्याद्वारे किमान २००० कोटी रुपयांची उलाढाल वाढवणे, हे उद्दिष्ट प्रसाद देवस्थळी यांनी बोलून दाखवले. यासाठी कोकण कोस्टल टीमने गेल्या ३० दिवसांत ४००० किमी प्रवास करून २५ जिल्ह्यांतील धावपटूंना आमंत्रित केले आहे.
मान्यवरांचे पाठबळ आणि प्रायोजक
उद्योगमंत्री तथा पालकमंत्री उदय सामंत यांच्या पुढाकाराने महाराष्ट्र औद्योगिक विकास महामंडळ (MIDC) आणि मराठी भाषा विभाग हे या उपक्रमाचे प्रमुख प्रायोजक आहेत. तसेच बँक ऑफ इंडिया, ॲड प्लस H2O, सोर्जेन सॉक्स, एनर्जाल, जोशी फूड्स आणि रत्नागिरी हॉटेल असोसिएशनचे विशेष सहकार्य लाभले आहे. रत्नागिरी जिल्हा ॲथलेटिक्स असोसिएशनचे संदीप तावडे यांनी या उपक्रमाच्या प्रामाणिक हेतूचे कौतुक केले आहे.
नोंदणीसाठी आवाहन या स्पर्धेसाठी नोंदणीची अंतिम तारीख २० डिसेंबर २०२५ आहे.
ऑनलाईन : परदेशातील धावपटूंसाठी ‘आर्यक सोल्युशन्स’ने विशेष ॲप विकसित केले असून ते आभासी (Virtual) पद्धतीने सहभागी होऊ शकतात.
ऑफलाईन : स्थानिक नागरिकांसाठी आनंद सागर अपार्टमेंट, मजगाव रोड येथील कार्यालयात नोंदणीची सोय उपलब्ध आहे.
कोकणच्या या हक्काच्या स्पर्धेत स्थानिकांनी मोठ्या संख्येने सहभागी व्हावे, असे आवाहन आयोजकांनी केले आहे. मुंबई रोड रनर्सच्या रेटिंगमध्ये या मॅरेथॉनला १ नंबरचे स्थान मिळाले आहे, ही कोकणवासीयांसाठी अभिमानाची बाब आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:30 AM 11/Dec/2025
