रत्नागिरी : महाराष्ट्र शासनाच्या सांस्कृतिक कार्य संचालनालयातर्फे आयोजित ६४ व्या राज्यस्तरीय हौशी मराठी नाट्य स्पर्धेत (प्राथमिक फेरी) रत्नागिरी केंद्रावर **’समर्थ रंगभूमी’**च्या ‘अग्निपंख’ नाटकाने अभूतपूर्व यश संपादन केले आहे. रत्नागिरीच्या नाट्य इतिहासात प्रथमच एकाच नाटकाने सर्वच्या सर्व म्हणजेच तब्बल ९ विभागांतील प्रथम क्रमांकाची पारितोषिके पटकावून नवीन विक्रम प्रस्थापित केला आहे.
ज्येष्ठ नाटककार प्र. ल. मयेकर लिखित आणि युवा दिग्दर्शक ओंकार पाटील दिग्दर्शित ‘अग्निपंख’ नाटकाने स्पर्धेत निर्विवाद वर्चस्व गाजवत ‘प्रथम क्रमांकाचे नाटक’ म्हणून मान मिळवला आहे.
रौप्यपदकाचे मानकरी : अभिनयात मिनार पाटील आणि ऋचा मुकादम अव्वल
या स्पर्धेत अभिनयाचा कस लागला असताना, ‘अग्निपंख’मधील प्रमुख कलाकार भाव खाऊन गेले. नाटकातील ‘रावसाहेब’ ही दमदार भूमिका साकारणारे मिनार गजानन पाटील आणि ‘बाईसाहेब’ या भूमिकेला आपल्या अभिनयाने जिवंत करणाऱ्या ऋचा मुकादम यांना अनुक्रमे पुरुष आणि स्त्री अभिनय श्रेणीतील प्रथम क्रमांकाचे ‘रौप्यपदक’ जाहीर झाले आहे. मिनार पाटील यांनी आपल्या कसलेल्या अभिनयाच्या जोरावर अत्यंत चुरशीच्या स्पर्धेत हे यश खेचून आणले.
रत्नागिरीच्या इतिहासातील पहिलाच विक्रम
रत्नागिरीतील स्वातंत्र्यवीर सावरकर नाट्यगृहात महिनाभर चाललेल्या या नाट्य महोत्सवात अनेक तोडीस तोड नाटके सादर झाली. मात्र, रसिकांची आणि परीक्षकांची पसंती ‘अग्निपंख’ला मिळाली. विशेष म्हणजे, रत्नागिरी जिल्ह्याच्या आजवरच्या इतिहासात एकाच नाटकाला तांत्रिक आणि अभिनयासह सर्व ९ विभागांत प्रथम पारितोषिक मिळण्याची ही पहिलीच वेळ आहे.
‘अग्निपंख’च्या शिलेदारांची विजयी यादी: स्पर्धेत विविध विभागांत ‘अग्निपंख’ने मारलेली बाजी खालीलप्रमाणे:
- प्रथम क्रमांक नाटक: अग्निपंख (समर्थ रंगभूमी)
- सर्वोत्कृष्ट दिग्दर्शक: ओंकार पाटील
- सर्वोत्कृष्ट अभिनय (पुरुष – रौप्यपदक): मिनार गजानन पाटील (भूमिका: रावसाहेब)
- सर्वोत्कृष्ट अभिनय (स्त्री – रौप्यपदक): ऋचा मुकादम (भूमिका: बाईसाहेब)
- सर्वोत्कृष्ट प्रकाशयोजना: साई सिर्सेकर
- सर्वोत्कृष्ट नेपथ्य: प्रवीण धुमक
- सर्वोत्कृष्ट रंगभूषा: उदयराज तांगडी
- सर्वोत्कृष्ट संगीत दिग्दर्शन: ओंकार बंडबे
- सर्वोत्कृष्ट वेशभूषा: चैताली पाटील
या दैदिप्यमान यशाबद्दल दिग्दर्शक ओंकार पाटील, अभिनेता मिनार पाटील, अभिनेत्री ऋचा मुकादम, तसेच समर्थ रंगभूमीचे श्रीकांत पाटील, अजित पाटील आणि संपूर्ण टीमचे सर्व स्तरातून कौतुक होत आहे. स्पर्धेच्या पुढील राज्यस्तरीय अंतिम फेरीत रत्नागिरीचे नाव उज्ज्वल करण्यासाठी या टीमला रत्नागिरीकरांनी शुभेच्छा दिल्या आहेत.
