रत्नागिरी : सध्या रत्नागिरी जिल्ह्यासह संपूर्ण महाराष्ट्रात उन्हाचा पारा कमालीचा वाढला आहे. घामाच्या धारा आणि अंगाची लाहीलाही करणाऱ्या या उष्म्यामुळे नागरिक हैराण झाले असून, शरीराला थंडावा देणाऱ्या थंडपेयांकडे कल वाढला आहे. मात्र, ऐन उन्हाळ्यात लिंबाच्या दराने मोठी उसळी घेतल्याने सर्वसामान्यांच्या खिशाला चांगलीच कात्री बसत आहे.
एका लिंबाची किंमत १० रुपये
काही दिवसांपूर्वीपर्यंत किरकोळ बाजारात १० रुपयांना तीन लिंबे सहज मिळत होती. मात्र, आता हेच चित्र पूर्णपणे बदलले आहे. सध्या रत्नागिरीच्या बाजारपेठेत एका लिंबाची विक्री १० रुपयांना केली जात आहे. लिंबाच्या दरात झालेली ही वाढ पाहता, लिंबू सरबत पिणे आता सर्वसामान्यांसाठी चैनीची गोष्ट बनली आहे.
रसवंती आणि सरबत विक्रेत्यांना फटका
वाढत्या महागाईचा परिणाम रस्त्यावरील सरबत विक्रेत्यांवरही झाला आहे. पूर्वी १० ते १५ रुपयांना मिळणारे लिंबू सरबत आता २० ते २५ रुपयांपर्यंत पोहोचले आहे. वाढते दर आणि घटलेली आवक यामुळे विक्रेतेही हतबल झाले आहेत.
लिंबाची आवक घटली, मागणी वाढली
रत्नागिरीमध्ये प्रामुख्याने कोल्हापूर, सोलापूर आणि इतर भागांतून लिंबाची आवक होते. मात्र, सध्या ही आवक अत्यंत मर्यादित स्वरूपात होत आहे. दुसरीकडे उन्हाळ्यामुळे मागणीत प्रचंड वाढ झाल्याने मागणी आणि पुरवठा यांचे गणित बिघडले आहे. मे महिन्यात लग्नसराई आणि कडक उन्हामुळे ही मागणी अधिक वाढणार असून, लिंबाचे दर आणखी वधारण्याची शक्यता वर्तवण्यात येत आहे.
पर्यायाचा शोध: लिंबाऐवजी दह्याला पसंती
लिंबाचे दर गगनाला भिडल्याने गृहिणींनी आता आपला मोर्चा दह्याकडे वळवला आहे. बाजारात सध्या ६० रुपये किलो दराने दही उपलब्ध आहे. लिंबाच्या तुलनेत दही स्वस्त आणि आरोग्यासाठी थंड असल्याने उन्हाळ्यातील जेवणात किंवा ताक करण्यासाठी दह्याचा वापर वाढला आहे.
वातावरणातील बदलाचा परिणाम
मागील काही दिवसांपासून हवामानात सतत बदल होत आहेत. कधी कडक ऊन तर कधी ढगाळ वातावरण, यामुळे उष्म्याचे प्रमाण अधिकच वाढले आहे. अशा परिस्थितीत स्वतःला हायड्रेटेड ठेवण्यासाठी नागरिक विविध पेयांचा आधार घेत आहेत, पण लिंबाच्या वाढत्या किमतींनी सध्या कोकणात लिंबू खरोखरच ‘भाव’ खाताना दिसत आहे.
