रत्नागिरी: रत्नागिरी शहरावर यंदा पाणी कपातीचे संकट ओढवणार की काय, अशी भीती व्यक्त केली जात असतानाच शहरवासीयांसाठी एक अत्यंत आनंदाची बातमी समोर आली आहे. शहराची जीवनवाहिनी असलेल्या ‘शिळ धरणा’मध्ये सध्या समाधानकारक पाणीसाठा उपलब्ध असून, किमान २० जूनपर्यंत शहराला पाणी कपात करण्याची कोणतीही गरज भासणार नाही, अशी माहिती रत्नागिरी नगरपालिकेचे पाणी सभापती निमेश नायर यांनी दिली आहे.
पाणी सभापतींकडून धरणाची प्रत्यक्ष पाहणी
वाढत्या उन्हामुळे बाष्पीभवनाचा वेग वाढला आहे, अशा स्थितीत धरणातील पाणीसाठा नेमका किती आहे, याची खात्री करण्यासाठी पाणी सभापती निमेश नायर यांनी आज शिळ धरणाला भेट देऊन प्रत्यक्ष पाहणी केली. या पाहणी दौऱ्यावेळी त्यांच्यासोबत रत्नागिरी नगरपालिकेच्या पाणी पुरवठा विभागातील प्रमुख अधिकारी आणि कर्मचारी उपस्थित होते.
पुढील ३५ दिवस पुरेल इतका साठा
आजच्या आकडेवारीनुसार, शिळ धरणात सध्या ९०३ एम एल डी (MLD) इतका पाणीसाठा उपलब्ध आहे. वाढत्या उष्णतेमुळे दररोज जरी साधारणपणे २५ एम एल डी पाण्याचे बाष्पीभवन झाले, तरी पुढील ३५ दिवस म्हणजेच साधारणपणे २० जूनपर्यंत शहराला पुरेल इतके पाणी धरणात शिल्लक आहे, असे निमेश नायर यांनी स्पष्ट केले आहे.
पाणी कपात टळली
दरवर्षी मे महिन्याच्या उत्तरार्धात अनेक शहरांमध्ये भीषण पाणीटंचाई निर्माण होते आणि पाणी कपातीचा निर्णय घ्यावा लागतो. मात्र, रत्नागिरी शहराची स्थिती यंदा समाधानकारक आहे. पावसाळा सुरू होण्याच्या संभाव्य तारखेपर्यंत (७ ते १० जून) पुरेसे पाणी शिल्लक असल्याने, सध्यातरी शहरात पाणी कपात लागू करण्याचा कोणताही विचार नगरपालिकेचा नाही. यामुळे नागरिकांनी सुटकेचा निःश्वास सोडला आहे.
पाणी पुरवठा सभापतींनी जरी दिलासा दिला असला, तरी नागरिकांनी पाण्याचा वापर काटकसरीने करावा आणि पिण्याच्या पाण्याचा अपव्यय टाळावा, असे आवाहनही नगरपालिकेकडून करण्यात येत आहे.
