मुंबईत गेल्या दोन दिवसांपासून सुरू असलेल्या तुफान पावसामुळे ठिकठिकाणी पाणी साचले असून झाडपडी आणि अपघातांच्या घटना घडत आहेत. याच दरम्यान आज ‘Mumbai Manhole Accident’ ची एक अत्यंत दुर्दैवी घटना समोर आली आहे. मुंबईतील साकीनाका येथील खैरानी रोड परिसरात दुरुस्तीसाठी उघड्या ठेवण्यात आलेल्या मॅनहोलमध्ये पडून अन्सारी शेख नावाच्या नागरिकाचा मृत्यू झाला. चालताना फोनवर बोलत असल्यामुळे त्यांचे खाली लक्ष गेले नाही आणि ते थेट २० ते २५ फूट खोल मॅनहोलमध्ये कोसळले. ही घटना घडताच परिसरात एकच धावपळ उडाली आणि स्थानिक कर्मचाऱ्यांनी तात्काळ रेस्क्यू टीमला पाचारण केले.
२५ फुटांवरील दुसऱ्या मॅनहोलमधून काढले बाहेर
प्रत्यक्षदर्शींनी दिलेल्या माहितीनुसार, अन्सारी शेख मॅनहोलमध्ये पडल्याचे बाजूलाच काम करणाऱ्या एका कर्मचाऱ्याच्या लक्षात आले. त्यांनी तात्काळ महानगरपालिका प्रशासन आणि मदत पथकाला याची माहिती दिली. घटनेचे गांभीर्य ओळखून रेस्क्यू टीमने तातडीने सर्च ऑपरेशन सुरू केले. शोधमोहीम राबवून अन्सारी शेख यांना त्याच रस्त्यावरील पुढील २५ फुटांवर असलेल्या दुसऱ्या मॅनहोलमधून बाहेर काढण्यात आले. बाहेर काढले तेव्हा ते बेशुद्ध अवस्थेत होते, मात्र दुर्दैवाने उपचारापूर्वीच त्यांचा मृत्यू झाला.
वॉर्ड ऑफिसरला कामाची माहितीच नाही: महापौर रितू तावडे
या गंभीर दुर्घटनेनंतर मुंबईच्या महापौर रितू तावडे यांनी पालिका प्रशासनाच्या ढिसाळ कारभारावर तीव्र आक्षेप घेतला आहे. “ही अत्यंत धक्कादायक घटना असून खुद्द येथील वॉर्ड ऑफिसरला या मॅनहोल दुरुस्तीच्या कामाची कोणतीही माहिती नव्हती. या कामासाठी कोणतीही अधिकृत वर्क ऑर्डर देण्यात आली नव्हती,” अशी माहिती महापौरांनी दिली. जर एखाद्या खाजगी ठेकेदाराने हे काम सुरू केले होते, तरीही तिथे सुरक्षा बॅरिकेड्स लावणे बंधनकारक होते, असे सांगत महापौरांनी या प्रकरणाची सखोल चौकशी करून दोषींवर कडक कारवाई करण्याचे आश्वासन दिले आहे. तसेच चेंबूर येथील घटनेप्रकरणी कालच तीन जणांचे निलंबन करण्यात आल्याचे त्यांनी नमूद केले.
२०१७ मधील डॉ. अमरापूरकर यांच्या दुर्घटनेची पुनरावृत्ती
या घटनेनंतर मुंबईतील राजकीय वातावरण तापले असून विरोधी पक्षांनी सत्ताधाऱ्यांना धारेवर धरले आहे. शिवसेना (उद्धव बाळासाहेब ठाकरे) पक्षाच्या नगरसेविका श्रद्धा जाधव यांनी २०१७ मधील अशाच एका भीषण दुर्घटनेची आठवण करून दिली. २९ ऑगस्ट २०१७ रोजी मुंबईतील प्रख्यात गॅस्ट्रोएन्टेरोलॉजिस्ट डॉ. दीपक अमरापूरकर यांचा प्रभादेवी-एल्फिन्स्टन रोड परिसरात साचलेल्या पाण्यातून जात असताना उघड्या मॅनहोलमध्ये वाहून गेल्याने मृत्यू झाला होता. त्यांचा मृतदेह दोन दिवसांनी वरळी परिसरात आढळला होता. या जुन्या घटनेचा संदर्भ देत, “प्रशासन मॅनहोलबाबत अजूनही गंभीर का नाही?” असा सवाल त्यांनी उपस्थित केला आहे.
कागदावरच उरले महापालिकेचे सुरक्षेचे दावे
दरवर्षी पावसाळ्यापूर्वी मुंबई महानगरपालिकेकडून पूर परिस्थिती नियंत्रण, मॅनहोलला सुरक्षा जाळ्या बसवणे, नवीन झाकणे लावणे आणि धोकादायक ठिकाणी संरक्षक बॅरिकेड्स उभारण्याचे मोठे दावे केले जातात. मात्र, साकीनाका येथील घटनेने पालिकेच्या या मान्सूनपूर्व नियोजनातील फोलपणा पुन्हा एकदा चव्हाट्यावर आणला आहे. नऊ वर्षांनंतरही मुंबईकरांना त्याच जुन्या आणि जीवघेण्या धोक्यांचा सामना करावा लागत असल्याने नागरिकांमधून तीव्र संताप व्यक्त होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:52 02-07-2026
