रत्नागिरी: जिल्ह्यातील तृतीयपंथीय (Transgender) व्यक्तींना स्वयंरोजगार आणि व्यवसायाच्या नवीन संधी उपलब्ध करून देण्यासाठी शासनाने एक अत्यंत महत्त्वपूर्ण पाऊल उचलले आहे. तृतीयपंथीयांचा आर्थिक, सामाजिक, शैक्षणिक आणि सांस्कृतिक विकास घडवून आणण्याच्या उद्देशाने ‘स्वयंरोजगार व व्यवसायासाठी बीज भांडवल योजना’ सुरू करण्यात आली आहे. राष्ट्रीयीकृत बँकांच्या माध्यमातून हे कर्ज उपलब्ध करून दिले जाणार आहे.
या योजनेचा अधिकाधिक लाभ घ्यावा, असे आवाहन रत्नागिरी समाज कल्याण कार्यालयाचे सहाय्यक आयुक्त दीपक घाटे यांनी केले आहे.
व्यवसायाच्या स्वरूपानुसार मिळणार आर्थिक मदत
या योजनेअंतर्गत तृतीयपंथीय लाभार्थ्यांना त्यांच्या व्यवसायाच्या गरजेनुसार ३ टप्प्यांत अर्थसाहाय्य केले जाणार आहे: १. लघु कर्ज योजना: ₹२५,००० (पंचवीस हजार रुपये) २. मध्यम कर्ज योजना: ₹५०,००० (पन्नास हजार रुपये) ३. दीर्घ कर्ज योजना: ₹२,००,००० (दोन लाख रुपये)
५०% कर्ज आणि ४५% सरकारी अनुदान!
या योजनेचे सर्वात मोठे वैशिष्ट्य म्हणजे लाभार्थ्याला व्यवसायासाठी लागणाऱ्या एकूण भांडवलापैकी केवळ ५% रक्कम स्वतः भरायची आहे. उर्वरित रक्कमेपैकी ४५% रक्कम शासन अनुदानामार्फत (Subsidy) दिली जाईल, तर ५०% रक्कम कर्ज स्वरूपात मिळणार आहे.
विनाजामीन आणि विनातारण कर्ज
सर्वसामान्यपणे कर्ज घेण्यासाठी बँकेत तारण किंवा जामीनदाराची आवश्यकता असते. मात्र, या बीज भांडवल योजनेअंतर्गत तृतीयपंथीय कर्जदारास कोणत्याही प्रकारच्या जामिनाची किंवा तारणाची (No Collateral/Guarantee) गरज नाही.
योजनेसाठी पात्रता काय आहे?
- अर्जदार हा तृतीयपंथीय असावा आणि त्याच्याकडे सक्षम प्राधिकाऱ्याने दिलेले ओळखपत्र असणे बंधनकारक आहे.
- अर्जदार महाराष्ट्र राज्याचा किमान १० वर्षे रहिवासी असावा (अधिवास प्रमाणपत्र/Domicile Certificate आवश्यक).
- अर्जदाराचे वय १८ ते ५० वर्षे दरम्यान असावे आणि तो व्यवसाय करण्यास सक्षम असावा.
- लाभार्थ्याने यापूर्वी शासनाच्या इतर कोणत्याही बीज भांडवल योजनेचा लाभ घेतलेला नसावा.
- व्यवसायाचे काही कौशल्य किंवा प्रशिक्षण घेतले असल्यास अर्जात त्याचा उल्लेख करावा.
आवश्यक कागदपत्रे कोणती?
योजनेचा लाभ घेण्यासाठी खालील कागदपत्रे आवश्यक आहेत:
- सक्षम प्राधिकाऱ्याचे ओळखपत्र.
- रहिवासी पुरावा: रेशन कार्ड / निवडणूक ओळखपत्र / लाईट बिल / पॅनकार्ड / घराची टॅक्स पावती किंवा भाडे करारपत्र.
- व्यवसायाचा परवाना आणि स्थायी पत्ता.
- व्यवसायासाठी लागणाऱ्या सामग्रीचे / यंत्रसामग्रीचे कोटेशन आणि बिले.
- व्यवसायाच्या जागेचा ७/१२ उतारा किंवा भाडेकरारनामा (जागा भाड्याची असल्यास मालकाचे ना हरकत प्रमाणपत्र).
- स्थानिक स्वराज्य संस्थेचे (ग्रामपंचायत/नगरपालिका) व्यवसाय करण्याबाबतचे ना हरकत प्रमाणपत्र (NOC).
- अर्जदाराचे २ पासपोर्ट साईझ फोटो.
येथे साधा संपर्क:
या योजनेच्या अधिक माहितीसाठी आणि अर्जासाठी लाभार्थ्यांनी सहाय्यक आयुक्त, समाज कल्याण कार्यालय, डॉ. बाबासाहेब आंबेडकर सामाजिक न्याय भवन, कुवारबाव, रत्नागिरी येथे प्रत्यक्ष संपर्क साधावा, असे प्रशासनाकडून सांगण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:42 18-05-2026
