◼️ जगबुडी आणि काजळी नदी वगळता इतर जलस्रोत कोरडे; जूनच्या सुरुवातीला सरासरीपेक्षा अत्यंत कमी पाऊस
रत्नागिरी जिल्ह्यातील नद्यांची पाणी पातळी |
रत्नागिरी: वाढत्या तापमानाचा फटका रत्नागिरी जिल्ह्यातील जलस्रोतांना बसू लागला असून, जिल्ह्यातील प्रमुख नद्यांची पाणी पातळी दिवसेंदिवस वेगाने कमी होत चालली आहे. खेड येथील जगबुडी आणि लांजा येथील काजळी नदीचा अपवाद वगळता उर्वरित सर्व नद्यांमधील पाणी पातळी शून्यावर आली आहे. जून महिना सुरू झाला तरी अद्याप जिल्ह्यात म्हणावा तसा पाऊस झालेला नाही, परिणामी अनेक भागांत भीषण पाणीटंचाई निर्माण झाली आहे. हवामानातील बदलांमुळे यंदाच्या ऐन पावसाळ्यातही रत्नागिरीत तीव्र पाणी टंचाई भासण्याची शक्यता निर्माण झाली असून, ग्रामीण भागात सद्यस्थितीत १८ टँकर्सद्वारे पाणीपुरवठा केला जात आहे.
मागील वर्षाच्या तुलनेत यंदा अत्यल्प पाऊस
रत्नागिरी जिल्ह्यात मागील वर्षाच्या तुलनेत यंदा पावसाने ओढ दिली आहे. गेल्या वर्षी १ आणि २ जूनपर्यंत जिल्ह्यात सरासरी ११.६१ मिमी पावसाची नोंद झाली होती. याउलट, यंदाच्या वर्षी याच कालावधीत केवळ ०.५५ मिमी इतक्या अत्यंत नगण्य पावसाची नोंद झाली आहे. गतवर्षी मे महिन्याच्या १८ तारखेपासूनच पावसाने दमदार हजेरी लावली होती आणि सुरुवातीच्या आठ दिवसांतच महिन्याभराचा पाऊस झाला होता. मान्सूनपूर्व आणि मान्सूनच्या पावसाने जिल्ह्याला झोडपून काढले होते, मात्र यंदा परिस्थिती पूर्णपणे उलटी झाली आहे.
दमट हवामान आणि तापमान ३६ अंशांवर
सध्या रत्नागिरी जिल्ह्यात कोरड्या हवामानाऐवजी तीव्र दमट हवामानाचा अनुभव येत असून जिल्ह्याचे तापमान ३६ अंश सेल्सिअसपर्यंत पोहोचले आहे. या वाढत्या तापमानामुळे जिल्ह्यातील नदी आणि धरणांमधील पाणी साठ्याचे वेगाने बाष्पीभवन होत असून जलपातळी पूर्णपणे खालावत चालली आहे. पाऊस लांबल्याने भूगर्भातील पाणी पातळीवरही याचा विपरीत परिणाम होत असल्याचे चित्र आहे.
नद्यांमधील पाणी साठ्याची सद्यस्थिती
जिल्ह्यातील नदी प्रणालीचा आढावा घेतला असता, केवळ दोन नद्यांमध्ये काही प्रमाणात पाणी शिल्लक आहे. खेड येथील जगबुडी नदीत ३.२५ मीटर तर लांजा येथील काजळी नदीत ११.३० मीटर इतका पाणीसाठा उपलब्ध आहे. याउलट, सोनवी, मुचकुंदी आणि शास्त्री नदीची पाणी पातळी थेट शून्यावर गेली आहे. वशिष्ठी, कोदवली आणि बावनदी या नद्यांमध्ये अवघा एक ते दीड टक्का पाणीसाठा शिल्लक राहिला आहे. जर आणखी काही दिवस अशीच परिस्थिती राहिली तर या नद्यांमधील उर्वरित साठाही संपुष्टात येण्याची भीती व्यक्त होत आहे. आगामी काळात वेळेत पाऊस झाल्यासच नद्यांमधील पाणी पातळी वाढू शकेल, असे प्रशासकीय सूत्रांकडून सांगण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:33 04-06-2026
