दर्शनी भागात पाणी साचले, रंगकाम व प्लास्टर सुमार दर्जाचे; “जनतेच्या पैशांशी खेळणाऱ्यांना सोडणार नाही”, पालकमंत्र्यांचा थेट इशारा
रत्नागिरी : सुमारे ३० ते ३५ कोटी रुपये खर्च करून उभारण्यात येत असलेल्या रत्नागिरी नगरपरिषदेच्या नूतन प्रशासकीय इमारतीचे बांधकाम वादाच्या भोवऱ्यात सापडले आहे. इमारतीचे काम अत्यंत सुमार व निकृष्ट दर्जाचे होत असल्याचे खुद्द पालकमंत्री उदय सामंत यांच्या पाहणीत निदर्शनास आले. यावरून त्यांनी संबंधित ठेकेदार आणि नगरपालिकेच्या अभियंत्यांची (इंजिनिअर्स) चांगलीच कानउघाडणी करत तीव्र शब्दांत संताप व्यक्त केला.
उद्घाटनापूर्वीच कामाचे पितळ उघडे
अजून या भव्य नूतन इमारतीचे लोकार्पणही झालेले नसताना बांधकामातील गंभीर त्रुटी समोर आल्या आहेत:
- दर्शनी भागात पाण्याचे डबके: इमारतीच्या मुख्य दर्शनी भागातच पावसाचे पाणी साचून डबके तयार झाले आहे.
- निकृष्ट दर्जाचे रंगकाम व प्लास्टर: संपूर्ण इमारतीचे रंगकाम अत्यंत निकृष्ट असून भिंतींचे प्लास्टरही निकृष्ट दर्जाचे झाल्याचे दिसून येत आहे.
- पंख्यांमधून मोठा आवाज: इमारतीतील विविध कार्यालयांमध्ये बसवण्यात आलेल्या नव्या पंख्यांमधून आत्तापासूनच प्रचंड घरघर आणि मोठे आवाज येत आहेत.
- पेव्हर ब्लॉक चे काम निकृष्ट : इमारतीच्या समोर बसवण्यात आलेले पेव्हर ब्लॉक देखील हलत आहेत. यावरून रहदारी सुरु झाल्यावर हे निखळण्याची शक्यता आहे.
“हा जनतेचा पैसा, कसूर करणाऱ्यांना सोडणार नाही”: ना. उदय सामंत
नगरपालिकेच्या कामातील निष्काळजीपणावर जोरदार ताशेरे ओढत पालकमंत्री उदय सामंत यांनी अधिकाऱ्यांना चांगलेच धारेवर धरले.
पालकमंत्री उदय सामंत यांचा इशारा:
“नगरपालिकेचा निधी म्हणजे रत्नागिरीतील सर्वसामान्य जनतेचा कररूपाने आलेला पैसा आहे. रत्नागिरीकरांच्या पैशांशी खेळणाऱ्या आणि कामात कसूर करणाऱ्या कोणत्याही अधिकाऱ्याला वा ठेकेदाराला मी पाठीशी घालणार नाही. ३० ते ३५ कोटी रुपये खर्च करूनही जर इतके निकृष्ट दर्जाचे काम होत असेल, तर हे खपवून घेतले जाणार नाही. इमारतीचे अधिकृत उद्घाटन झाल्यानंतर जर असे प्रकार निदर्शनास आले असते, तर थेट पोलिसांत गुन्हा दाखल केला असता.”
पालकमंत्र्यांनी दिलेल्या या कडक इशाऱ्यानंतर आता संबंधित ठेकेदार आणि पालिका प्रशासन या निकृष्ट कामात तातडीने सुधारणा करणार का, याकडे संपूर्ण रत्नागिरीकरांचे लक्ष लागले आहे.
