रत्नागिरी:
Ratnagiri Railway Station (रत्नागिरी रेल्वे स्थानक) परिसरात ५ जुलै रोजी रात्री पावणे अकराच्या सुमारास मुसळधार पावसासह आलेल्या सोसाट्याच्या वाऱ्यामुळे नूतनीकरण करण्यात आलेल्या छताचा एक मोठा भाग अचानक कोसळला. अवघ्या काही सेकंदांत घडलेल्या या घटनेमुळे स्थानक परिसरात तात्पुरती भीतीची परिस्थिती निर्माण झाली होती. पावसापासून बचाव करण्यासाठी या छताखाली थांबलेल्या प्रवाशांनी आणि नागरिकांनी तातडीने बाजूला धाव घेतल्याने सुदैवाने कोणतीही जीवितहानी झाली नाही, तसेच कोणालाही दुखापत झाली नाही.
कोट्यवधींच्या नूतनीकरण कामाला वादळी पावसाचा तडाखा
रत्नागिरी शहरात सध्या मुसळधार पाऊस आणि वेगवान वाऱ्याचे थैमान सुरू आहे. याच वादळी हवामानाचा फटका कोकण रेल्वेच्या मुख्य स्थानकांपैकी एक असलेल्या रत्नागिरी स्थानकाला बसला. विशेष म्हणजे, या स्थानकाचे नुकतेच कोट्यवधी रुपये खर्च करून नूतनीकरण करण्यात आले होते. ५ जुलैच्या रात्री पावणे अकरा वाजता झालेल्या या दुर्घटनेनंतर रेल्वे स्थानकाचा, विशेषतः रिक्षा स्टँडकडील भाग पूर्णपणे अंधारात बुडाला होता.
प्रवाशांच्या सतर्कतेमुळे अनर्थ टळला
रात्री पाऊस सुरू झाल्यामुळे रेल्वे स्थानकावर आलेले अनेक प्रवासी आणि स्थानिक नागरिक आसऱ्यासाठी रिक्षा स्टँड परिसरातील या छताखाली उभे होते. मात्र, छताचा भाग निखळत असल्याचे ऐनवेळी नागरिकांच्या लक्षात आले. अत्यंत सावधगिरी बाळगत सर्वांनी तत्परतेने तिथून बाजूला पळ काढला. नागरिकांच्या याच प्रसंगावधानाने मोठा अपघात टळला.
गर्दीच्या वेळी दुर्घटना घडली असती तर?
ही घटना रात्रीच्या वेळी घडल्याने स्थानकावर नेहमीच्या तुलनेत प्रवाशांची आणि वाहनांची वर्दळ कमी होती. मात्र, हेच नूतनीकरण केलेले छत जर दिवसा किंवा रेल्वे गाड्यांच्या येण्या-जाण्याच्या गर्दीच्या वेळी कोसळले असते, तर मोठी जीवितहानी झाली असती. दिवसा या ठिकाणी प्रवासी, रिक्षाचालक आणि सामान्यांची मोठी गर्दी असते, ज्यामुळे मोठी हानी सोसावी लागली असती, अशी स्थिती या घटनेनंतर समोर आली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:15 06-07-2026
