खेड:
Khed Car Accident (खेड तालुक्यातील शिवतर रोडवर) रविवारी सकाळी एक थरारक दुर्घटना घडली. सैनिक स्कूल, जामगे येथून बाहेर पडणारी एक लाल रंगाची कार पुराच्या जोरदार प्रवाहात वाहून गेली. या कारमध्ये एक महिला आणि दोन पुरुष असे एकूण तीन प्रवासी प्रवास करत होते. सैनिक स्कूलच्या गेटवरील सुरक्षारक्षकाने पुढे पुराचे पाणी असल्याचा इशारा देत जाण्यास मनाई केली होती, मात्र चालकाने या इशाऱ्याकडे दुर्लक्ष करून वाहन पुढे नेल्याने हा अपघात घडला.
प्रचंड प्रवाहामुळे कार पुलाच्या रेलिंगला अडकली
चालकाने गाडी पुढे नेल्यानंतर पाण्याचा वेग प्रचंड असल्याने कारचा ताबा सुटला आणि ती पुराच्या पाण्यात वाहून गेली. सुदैवाने, वाहून जाणारी कार पुलावरील लोखंडी रेलिंगला जाऊन अडकली. कार पाण्यात अडकल्यानंतर त्यातील तिन्ही प्रवाशांनी जीव वाचवण्यासाठी कारमधून बाहेर पडण्याचा प्रयत्न केला, मात्र पाण्याचा प्रवाह इतका तीव्र होता की कारमधून बाहेर पडताच ते तिघेही पुराच्या पाण्यात वाहू लागले.
स्थानिक नागरिकांचे तत्परतेने बचावकार्य
हा गंभीर प्रकार आजूबाजूला असलेल्या स्थानिक नागरिकांच्या निदर्शनास येताच त्यांनी कोणतीही वेळ न दवडता तातडीने घटनास्थळाकडे धाव घेतली. नागरिकांनी अत्यंत प्रतिकूल परिस्थितीत जीवाची बाजी लावून बचावकार्य सुरू केले. स्थानिक तरुणांनी आणि नागरिकांनी दाखवलेल्या तत्परतेमुळे पुराच्या पाण्यात वाहून जाणाऱ्या तिघांनाही सुखरूप पाण्यातून बाहेर काढण्यात यश आले. नागरिकांच्या या धाडसामुळे तिघांचेही प्राण वाचले असून एक मोठी दुर्घटना टळली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:15 06-07-2026
