चिपळूण:
Chiplun Forest Raid | चिपळूण तालुक्यातील टेरव येथे वन विभागाच्या अधिकाऱ्यांनी अचानक धाड टाकून एक मोठी कोळसा भट्टी पूर्णपणे उद्ध्वस्त केली आहे. जुलै महिन्यातील भर पावसाळ्यात मोठ्या प्रमाणावर जंगलतोड करून ही कोळसा भट्टी बेकायदेशीररित्या लावली जात असल्याचे या कारवाईमुळे उघड झाले आहे. परिक्षेत्र वनअधिकारी सरवर खान यांना मिळालेल्या गोपनीय माहितीच्या आधारे वनविभागाच्या विशेष पथकाने ही धडक कारवाई प्रत्यक्ष घटनास्थळी जाऊन केली.
टेरव परिसर वर्षानुवर्षे कोळसा भट्ट्यांचे माहेरघर
चिपळूण तालुक्यातील टेरव हे गाव नेहमीच बेकायदेशीर कोळसा भट्ट्यांचे माहेरघर ठरले आहे. या दुर्गम भागात वर्षानुवर्षे कोळसा भट्ट्यांचा व्यवसाय छुप्या पद्धतीने सुरू आहे. मध्यंतरीच्या काळात स्थानिक पातळीवर तक्रारींचा ससेमिरा सुरू झाल्याने येथील कोळसा भट्टी व्यावसायिकांनी काही काळासाठी दुसऱ्या गावात स्थलांतर केले होते. मात्र, परिस्थिती निवळताच पुन्हा त्यांनी मूळ गावातच हा व्यवसाय सुरू केला. वन विभागाचे अधिकारी मात्र नेहमी टेरव येथे कोळसा भट्ट्या सुरू असल्याचे जाहीरपणे मान्य करत नव्हते, परंतु या थेट कारवाईमुळे वन विभागाचा दावा फोल ठरला आहे.
रायगडच्या कातकरी कुटुंबांचे वास्तव्य आणि जंगलतोड
या प्रकरणाची पार्श्वभूमी पाहता, काही दिवसांपूर्वीच भर पावसाळ्यात टेरव येथे रायगड जिल्ह्यातील कातकरी कुटुंबे वास्तव्याला आली होती. ही कुटुंबे गावात आल्यापासूनच परिसरात मोठ्या प्रमाणावर जंगलतोड सुरू झाल्याचा अंदाज काही स्थानिकांनी वर्तवला होता. त्यातच गेल्या आठवडाभरात पावसाचे प्रमाण लक्षणीयरीत्या कमी झाले असून उन्हाचा कडाका वाढला आहे. या बदललेल्या हवामानाचा आणि कडक उन्हाचा फायदा घेत टेरव येथील एका स्थानिक कोळसा व्यावसायिकाने थेट कोळसा भट्टी लावून काम सुरू केले होते.
तासभर चालली कारवाई; लाकूडसाठा केला नष्ट
टेरव परिसरातून कोळशाच्या भट्टीचा धूर निघत असल्याची गोपनीय माहिती परिक्षेत्र वनअधिकारी सरवर खान यांना मिळाली. त्यानुसार त्यांच्या मार्गदर्शनाखाली वनपाल साताप्पा सावंत, कोळकेवाडीचे वनरक्षक कृष्णा इर्मळे आणि आर. आर. टीमचे सदस्य अथर्व घाग यांच्या पथकाने टेरव येथे अचानक धाड टाकली. घटनास्थळी पोहोचले तेव्हा कोळसा भट्टी पूर्णपणे धगधगत असल्याचे पथकाच्या निदर्शनास आले. वन कर्मचाऱ्यांनी विविध अवजारांच्या साहाय्याने संपूर्ण लाकूडसाठा आणि भट्टी उद्ध्वस्त करून टाकली. सुमारे तासभर ही कारवाई सुरू होती, मात्र वनविभागाची चाहूल लागताच संशयित आरोपी पसार झाल्याने कारवाई दरम्यान तिथे कोणीही उपलब्ध नव्हते.
लाकूडतोडीवर वनविभागाच्या नियंत्रणाबाबत प्रश्नचिन्ह
शासकीय नियमांनुसार कोळसा भट्टी लावण्यास कायदेशीररित्या पूर्णपणे प्रतिबंध आहे. तरीही टेरव परिसरात नेहमी मोठ्या प्रमाणात बेकायदेशीर जंगलतोड केली जाते आणि त्या लाकडांचा वापर कोळसा भट्ट्यांसाठी केला जातो. थेट जुलै महिन्यातील भर पावसाळ्यात अशा प्रकारे कोळसा भट्टी पेटवून व्यवसाय सुरू झाल्याने, वनविभागाच्या अधिकाऱ्यांचे स्थानिक लाकूडतोडीवर आणि तस्करांवर कसलेही नियंत्रण राहिले नसल्याचे या गंभीर घटनेतून उघड झाले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:26 15-07-2026
