मंडणगड: Mandangad News Update | तालुक्यातील तिडे गावातील बोरीचा माळ परिसरात असलेल्या जंगलातून एक धक्कादायक आणि हृदयद्रावक घटना समोर आली आहे. गेल्या अडीच महिन्यांपासून बेपत्ता असलेल्या एका वृद्धाचे मानवी अवशेष (कवटी व हाडे) आणि कपडे जंगलात आढळून आल्याने तिडे परिसरामध्ये मोठी खळबळ उडाली आहे. नारायण महादेव बर्वे (रा. तिडे) असे या मृत पावलेल्या व्यक्तीचे नाव आहे. या अत्यंत दुर्दैवी घटनेमुळे संपूर्ण मंडणगड तालुक्यात आणि तिडे गावात मोठी हळहळ व्यक्त केली जात आहे.
२ मे पासून होते बेपत्ता; नातेवाईकांनी दिली होती पोलिसांत तक्रार
प्राप्त माहितीनुसार, नारायण बर्वे हे २ मे २०२६ रोजी दुपारच्या सुमारास आपल्या घरातून अचानक बेपत्ता झाले होते. सर्वत्र शोध घेऊनही ते न सापडल्याने त्यांच्या हताश नातेवाईकांनी अखेर मंडणगड पोलीस ठाण्यात ते बेपत्ता असल्याची रीतसर तक्रार दाखल केली होती. या तक्रारीच्या आधारे मंडणगड पोलीस आणि त्यांचे नातेवाईक सातत्याने त्यांचा शोध घेत होते. मात्र, दीर्घकाळ उलटूनही त्यांचा कोणताही सुगावा लागत नव्हता.
झाडाजवळ सापडली मानवी कवटी आणि हाडे
दरम्यान, १३ जुलै रोजी दुपारी १२.१५ च्या सुमारास तिडे गावचे पोलीस पाटील रवींद्र पवार यांनी पोलिसांना आणि नातेवाईकांना एक महत्त्वाची माहिती दिली. बोरीचा माळ येथील जंगलात एका शिवणीच्या झाडाजवळ मानवी कवटी आणि हाडे पडलेली असल्याचे त्यांनी सांगितले. ही माहिती मिळताच नारायण बर्वे यांचे चिरंजीव अविनाश बर्वे आणि इतर नातेवाईक तातडीने पोलिसांसह घटनास्थळी दाखल झाले.
त्या ठिकाणी शिवणीच्या झाडाजवळ गळफास लावल्याच्या स्पष्ट खुणा पोलिसांना आढळून आल्या. तसेच झाडाच्या खाली एक मानवी कवटी, बरगड्यांची हाडे आणि काही जुने कपडे, चप्पल तसेच एक टोपी विखुरलेल्या अवस्थेत सापडली.
मुलाने कपडे व चपलेवरून ओळखले वडिलांचे पार्थिव
घटनास्थळी सापडलेले कपडे, चप्पल आणि टोपी पाहून अविनाश बर्वे यांनी हे अवशेष आपले बेपत्ता झालेले वडील नारायण महादेव बर्वे यांचेच असल्याची खात्री पटवून दिली. अडीच महिन्यांपूर्वी घरातून बाहेर पडलेल्या नारायण बर्वे यांनी जंगलात जाऊन गळफास लावून आत्महत्या केली असावी, असा प्राथमिक संशय व्यक्त केला जात आहे. प्रदीर्घ काळ झाल्यामुळे मृतदेहाचे रूपांतर केवळ अस्थींमध्ये झाले होते.
मंडणगड पोलिसांनी या खळबळजनक प्रकरणाची गांभीर्याने नोंद घेतली असून, तूर्तास पोलीस ठाण्यात आकस्मिक मृत्यूची (ADR) नोंद करण्यात आली आहे. जंगलात मिळालेले हे मानवी अवशेष पुढील वैद्यकीय व फॉरेन्सिक तपासणीसाठी पाठवण्यात येणार आहेत. या आत्महत्येमागील नेमके कारण काय होते? याचा अधिक तपास मंडणगड पोलीस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:49 15-07-2026
