सोनम वांगचुक यांची रुग्णालयात जे. पी. नड्डा अन् जितेंद्र सिंह यांच्याकडून भेट; हायकोर्टात आज महत्त्वाची सुनावणी
नवी दिल्ली: ‘Jantar Mantar Protest’ मुळे देशाची राजधानी दिल्लीतील वातावरण अधिकच तापले आहे. दिल्लीतील जंतरमंतर येथे कॉकरोच जनता पार्टीच्या (CJP) आंदोलनाचा आज ३३ वा दिवस असून बुधवार सकाळपासून हजारो आंदोलक पुन्हा एकदा एकत्र आले आहेत. यामध्ये २० जुलै रोजी संसदेवर काढण्यात आलेल्या मोर्चादरम्यान पोलिसांच्या लाठीचार्ज आणि अश्रूधुराच्या नळकांड्यांना सामोरे गेलेल्या आंदोलकांचाही मोठा भरणा आहे.
दिल्ली पोलिसांकडून १० एफआयआर; आंदोलकांवर गंभीर कलमांन्वये गुन्हे
२० जुलैच्या संसद मोर्चादरम्यान झालेल्या हिंसाचार आणि चकमकींप्रकरणी दिल्ली पोलिसांनी कडक पावले उचलत एकूण १० एफआयआर (FIR) नोंदवले आहेत. यामध्ये पार्लमेंट मार्ग पोलीस ठाण्यात ४, कनॉट प्लेसमध्ये ३ तर मंदिर मार्ग, बाराखंबा रोड आणि कर्तव्य पथ पोलीस ठाण्यात प्रत्येकी १ गुन्हा दाखल करण्यात आला आहे. आंदोलकांवर दंगलविरोधी पथकाच्या (RAF) जवानांच्या हत्येचा प्रयत्न करणे, दगडफेक, तोडफोड आणि सरकारी कामात अडथळा आणल्याचे गंभीर आरोप ठेवण्यात आले आहेत. दुसरीकडे, “केंद्रीय शिक्षणमंत्री धर्मेंद्र प्रधान यांचा राजीनामा मिळेपर्यंत मागे हटणार नाही,” असा पवित्रा CJP चे प्रवक्ते आशुतोष रांका यांनी घेतला आहे.
केंद्रीय मंत्र्यांकडून सोनम वांगचुक यांची भेट; अतिरिक्त २,००० सीआरपीएफ जवान दिल्लीत
२८ जूनपासून उपोषणाला बसलेले सोनम वांगचुक यांना दिल्ली उच्च न्यायालयाच्या निर्देशानुसार सफदरजंग रुग्णालयातून मेदांता रुग्णालयात हलवण्यात आले आहे. सूत्रांनी दिलेल्या माहितीनुसार, केंद्रीय मंत्री जे. पी. नड्डा आणि जितेंद्र सिंह यांनी मंगळवारी रात्री उशिरा मेदांता रुग्णालयात जाऊन वांगचुक यांची भेट घेतली.
दरम्यान, कायदा व सुव्यवस्था राखण्यासाठी केंद्र सरकारने पश्चिम बंगालमधून २० अतिरिक्त सीआरपीएफ (CRPF) कंपन्या विमानाने दिल्लीत तैनात करण्याचे आदेश दिले आहेत. सुमारे २,००० अतिरिक्त जवान दिल्ली पोलिसांच्या मदतीसाठी संसदेच्या पावसाळी अधिवेशनाच्या काळात तैनात केले जाणार आहेत. यापूर्वीच ३० कंपन्या आणि आरएएफचे जवान आधीपासूनच तैनात आहेत. काँग्रेसचे महासचिव के. सी. वेणुगोपाल यांनीही शिक्षणमंत्री धर्मेंद्र प्रधान यांच्या राजीनाम्याची जोरदार मागणी केली आहे.
दिल्ली उच्च न्यायालयात आज पोलीस कारवाईविरोधात सुनावणी
पोलीस कारवाई आणि उपोषणस्थळ जबरदस्तीने रिकामे केल्याप्रकरणी सोनम वांगचुक यांनी दाखल केलेल्या जनहित याचिकेवर (PIL) आज दिल्ली उच्च न्यायालयात सुनावणी होणार आहे. मुख्य न्यायमूर्ती देवेंद्र कुमार उपाध्याय आणि न्यायमूर्ती तेजस कारिया यांचे खंडपीठ या प्रकरणावर सुनावणी करेल. आंदोलकांवर कायद्याच्या योग्य प्रक्रियेशिवाय कोणतीही कठोर कारवाई किंवा छळ केला जाऊ नये, अशी मागणी या याचिकेत करण्यात आली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:02 22-07-2026
