“परीक्षा पे चर्चा करता मग विद्यार्थ्यांशीही चर्चा करा”; मनसेचा आंदोलनाला पूर्ण पाठींबा
मुंबई: ‘Raj Thackeray on PM Modi’ प्रकरणावरून आता राज्यातील राजकारण अधिकच तापले आहे. नीट (NEET) परीक्षा पेपरफुटी प्रकरणात केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी दिल्लीतील जंतरमंतर येथे आंदोलन करणाऱ्या विद्यार्थ्यांवर पोलिसांनी केलेल्या बेछूट लाठीमारावरून महाराष्ट्र नवनिर्माण सेनेचे प्रमुख राज ठाकरे यांनी केंद्र सरकार आणि पंतप्रधान नरेंद्र मोदी यांच्यावर अत्यंत कठोर शब्दांत हल्लाबोल केला आहे. “आंदोलकांवर केलेला बेफाम लाठीचार्ज पाहून हे सरकारच मानसिक रुग्ण झाले आहे आणि त्यांनाच रुग्णालयात भरती करण्याची गरज आहे,” अशी घणाघाती टीका राज ठाकरे यांनी सोशल मीडिया पोस्टद्वारे केली आहे.
“धर्मेंद्र प्रधान कोण लागून गेले?”; सरकारवर हुकूमशाहीचा आरोप
राज ठाकरे यांनी आपल्या पोस्टमध्ये केंद्र सरकारच्या कारभारावर आणि मनमानीवर जोरदार निशाणा साधला. “मुळात धर्मेंद्र प्रधान कोण लागून गेले आहेत की ज्यांचा राजीनामा घेणे म्हणजे सरकारला स्वतःचे अपयश वाटत आहे?” असा सवाल त्यांनी उपस्थित केला. मणिपूर जळत असताना तत्कालीन मुख्यमंत्र्यांना अभय देणाऱ्या या सरकारला जनतेच्या किंवा विरोधकांच्या मतांची तमा उरलेली नाही, असा आरोप करत ‘आम्ही काय करायचे हे कोणी सांगायचे नाही’ अशी सत्ताधाऱ्यांची वृत्ती बनल्याचे त्यांनी नमूद केले.
‘लेम डक’ पंतप्रधान आणि विद्यार्थ्यांचा आक्रोश
पंतप्रधान नरेंद्र मोदी यांच्या भूमिकेवर भाष्य करताना राज ठाकरे म्हणाले की, इंग्रजीतील ‘लेम डक’ या संकल्पनेप्रमाणे सध्याच्या पंतप्रधानांचा प्रभाव कमी झाला असून उत्तराधिकारी होण्याच्या स्पर्धेत असलेल्या शक्ती त्यांच्यावर दबाव आणत आहेत. “मोदीजी, तुम्ही ‘परीक्षा पे चर्चा’ करता, मग आता प्रत्यक्ष विद्यार्थ्यांशी चर्चा करा,” अशी मागणी करत त्यांनी स्पष्ट केले की, हे आंदोलन फक्त एका परीक्षेपुरते नसून देशातील महागाई, कंत्राटदारशाही, आणि पर्यावरणाच्या हासाविरोधात जनतेच्या मनात साचलेल्या एकूणच आक्रोशाचा उद्रेक आहे.
मनसेचा विद्यार्थ्यांच्या आंदोलनाला पूर्ण पाठिंबा
श्रीलंका, नेपाळ आणि जयप्रकाश नारायण यांच्या आंदोलनांचा दाखला देत राज ठाकरे यांनी विद्यार्थ्यांच्या धैर्याला सलाम केला. मनसेचा या आंदोलनाला आणि रास्त मागण्यांना सुरुवातीपासूनच पाठिंबा होता आणि पुढेही राहील, असे स्पष्ट करत अकार्यक्षम मंत्र्यांचा राजीनामा झालाच पाहिजे आणि परीक्षांमध्ये संपूर्ण पारदर्शकता आलीच पाहिजे, अशी ठाम मागणी त्यांनी केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:19 22-07-2026
