‘नीट’ आंदोलनाच्या पार्श्वभूमीवर सोशल मीडियावरील सक्रियतेवर भर; पंतप्रधानांनी दिला स्वतःच्या व्हिडिओचा दाखला
PM Narendra Modi यांनी केंद्रीय मंत्रिमंडळाच्या बैठकीत आपल्या सहकारी मंत्र्यांना इन्स्टाग्रामसारख्या लोकप्रिय सोशल मीडिया प्लॅटफॉर्मवर आपली सक्रियता आणि पोहोच (Reach) वाढवण्याचे स्पष्ट निर्देश दिले आहेत. आजची तरुण पिढी सोशल मीडियावर मोठ्या प्रमाणावर सक्रिय असल्याचे अधोरेखित करत, पंतप्रधानांनी सर्व मंत्र्यांना ‘रील्स’ (Reels) तयार करून सरकारची कामे, निर्णय आणि जनकल्याणकारी योजनांची माहिती थेट तरुणांपर्यंत पोहोचवण्याचा सल्ला दिला आहे.
“माझ्या व्हिडिओला दिलेल्या प्रतिसादाबद्दल धन्यवाद”
कॅबिनेट बैठकीत तरुणांशी संवाद साधण्याच्या विषयावर बोलताना, पंतप्रधान मोदी यांनी स्वतः काल तयार केलेल्या एका व्हिडिओचे उदाहरण म्हणून सादरीकरण केले. विशेष म्हणजे, नरेंद्र मोदी यांनी सलग दुसऱ्या दिवशी इन्स्टाग्रामवर एक नवीन व्हिडिओ पोस्ट केला आहे. या ताज्या व्हिडिओमध्ये त्यांनी पहिल्या व्हिडिओला मिळालेल्या अभूतपूर्व प्रतिसादाबद्दल नागरिकांचे आभार मानले. “माझा कालचा व्हिडिओ पाहिल्याबद्दल आणि त्यावर बहुमूल्य सूचना दिल्याबद्दल तुम्हा सर्वांचे खूप खूप आभार,” असे सांगत त्यांनी जनतेच्या सूचनांचे नेहमीच स्वागत असल्याचे नमूद केले.
कॅबिनेट बैठकीत मंत्र्यांना विचारला थेट सवाल
सूत्रांनी दिलेल्या माहितीनुसार, बैठकीदरम्यान पंतप्रधान मोदींनी उपस्थित मंत्र्यांना एक थेट प्रश्न विचारला. सरकारच्या किती मंत्री सध्या इन्स्टाग्रामवर सक्रिय आहेत, असा सवाल त्यांनी केला. त्यानंतर त्यांनी सर्व मंत्र्यांना इन्स्टाग्रामवर आपली रीच वाढवण्याचे आणि सरकारच्या विविध धोरणांची व योजनांची माहिती देणाऱ्या रील्स नियमितपणे शेअर करण्याचे आदेश दिले, जेणेकरून तरुणांपर्यंत सरकारचे काम प्रभावीपणे पोहोचू शकेल.
‘नीट’ आंदोलनाच्या सोशल मीडिया प्रभावाची दखल
पंतप्रधानांनी दिलेल्या या सल्ल्यामागे अलीकडच्या घडामोडींची पार्श्वभूमी असल्याचे मानले जात आहे. ‘नीट’ (NEET) परीक्षेतील गैरप्रकारामुळे बाधित झालेल्या विद्यार्थ्यांनी सोशल मीडिया प्लॅटफॉर्म्स, विशेषतः इन्स्टाग्राम रील्सचा वापर करून नॅशनल टेस्टिंग एजन्सी (NTA) आणि सरकारविरोधात मोठा विरोध नोंदवला होता.
दिल्लीतील जंतर-मंतरवर सुरू असलेले कॉक्रोच जनता पार्टीचे आंदोलन आणि विद्यार्थ्यांच्या मागण्या इन्स्टाग्राम रील्स व पोस्ट्समुळे व्यापक स्तरावर पोहोचल्या. पोलीस कारवाई आणि आंदोलनाचे व्हिडिओ वेगाने व्हायरल झाल्याने अनेक तरुण या आंदोलनात सहभागी झाले. सोशल मीडियाचा हाच प्रभाव आणि ताकद ओळखून पंतप्रधान नरेंद्र मोदी यांनी आपल्या संपूर्ण मंत्रिमंडळाला डिजिटल माध्यमांवर अधिक आक्रमक आणि सक्रिय राहण्याच्या सूचना दिल्या आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:27 25-07-2026
