आयआयएमयूएनच्या १५ व्या वर्धापन दिनानिमित्त निता मुकेश अंबानी सांस्कृतिक केंद्रात (NMACC) तीन दिवसीय भव्य परिषदेचे आयोजन
IIMUN Youth Conference च्या १५ व्या वर्धापन दिनाचे औचित्य साधून मुंबईत जगभरातील सर्वात मोठ्या युवा-नेतृत्व परिषदेचे आयोजन करण्यात आले आहे. या परिषदेच्या उद्घाटन सोहळ्यात राष्ट्रीय स्वयंसेवक संघाचे (RSS) सरसंघचालक डॉ. मोहन भागवत ६ ऑगस्ट रोजी मुंबईतील वांद्रे-कुर्ला संकुल (BKC) येथील निता मुकेश अंबानी सांस्कृतिक केंद्रात (NMACC) तरुण पिढीशी थेट संवाद साधणार आहेत.
देशातील तरुण पिढी आज लोकशाही, नेतृत्व आणि राष्ट्रउभारणीच्या विविध विषयांवर सक्रिय चर्चा करत असताना, या विशेष सत्रात ‘जनरेशन झी’ (Gen Z) आणि ‘जनरेशन अल्फा’ (Gen Alpha) च्या विद्यार्थ्यांशी महत्त्वपूर्ण विषयांवर विचारविनिमय केला जाईल. ‘इंडियाज इंटरनॅशनल मूव्हमेंट टू युनायटेड नेशन्स’ (IIMUN) द्वारे आयोजित या तीन दिवसीय भव्य वार्षिक चॅम्पियनशिप परिषदेत देशभरातील १०० हून अधिक शहरांमधील १५ ते १९ वयोगटातील २००० हून अधिक हायस्कूल आणि महाविद्यालयीन विद्यार्थी सहभागी होत आहेत.
IIMUN ची स्थापना २०११ मध्ये ऋषभ शाह यांनी केली असून, ‘भारत’ या संकल्पनेचा जागतिक पातळीवर प्रसार करणे हे या संस्थेचे मुख्य ध्येय आहे. विशेष म्हणजे, गेल्या १५ वर्षांपासून १५ ते २४ वयोगटातील तरुणच ही संस्था पूर्णपणे चालवत आहेत. या व्यासपीठाच्या माध्यमातून घडलेले अनेक तरुण पुढे जाऊन लोकप्रतिनिधी, आयएएस, आयपीएस अधिकारी, नामांकित वकील, लेखक आणि यशस्वी उद्योगपती बनले आहेत.
या संस्थेच्या उच्चस्तरीय सल्लागार मंडळात (Eminent Advisory Board) उद्योग, न्यायव्यवस्था, राजकारण आणि क्रीडा क्षेत्रातील मान्यवरांचा समावेश आहे. यामध्ये उद्योगपती अजय पिरामल, दीपक पारेख, नादिर गोदरेज, खासदार डॉ. शशी थरूर, माजी सरन्यायाधीश डी. वाय. चंद्रचूड, प्रसिद्ध चित्रपट दिग्दर्शक करण जोहर, माजी लष्करप्रमुख आणि भारतीय ऑलिम्पिक संघटनेच्या अध्यक्षा पी. टी. उषा यांसारख्या दिग्गजांचे मार्गदर्शन या संस्थेला लाभले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:39 03-08-2026
