देवरूख येथे किरकोळ वादातून तरुणाच्या कपाळावर बॅटरी मारून दुखापत; तिघांवर गुन्हा दाखल

साडवलीतील सह्याद्रीनगर येथील घटना; देवरूख पोलिसांत गुन्हा नोंद

रत्नागिरी जिल्ह्यातील संगमेश्वर तालुक्यातील साडवली सह्याद्रीनगर येथे किरकोळ रस्त्यावरील वादातून एका तरुणावर प्राणघातक हल्ला करून त्याला गंभीर जखमी केल्याची घटना घडली आहे. या प्रकरणी जखमीच्या भावाने दिलेल्या तक्रारीवरून देवरूख पोलीस ठाण्यात तीन जणांविरोधात विविध कलमांन्वये गुन्हा दाखल करण्यात आला आहे.

रस्त्यावरील खड्ड्यामुळे गाडी थांबवल्यावरून वाद

मिळालेल्या माहितीनुसार, फिर्यादी मनीष दीपक बांडागळे (वय २६ वर्षे, रा. सह्याद्रीनगर साडवली) हे ४ ऑगस्ट २०२६ रोजी सायंकाळी ६:०० वाजेच्या सुमारास आपल्या आईला सोडण्यासाठी स्प्लेंडर दुचाकीवरून (क्रमांक MH 08 BD 1158) जात होते. घराजवळील गद्रे यांच्या कंपाउंडजवळील कच्च्या रस्त्यावरील वळणावर खड्डा असल्याने त्यांनी गाडी हळू करून थांबवली.

यावेळी समोरून दुचाकीवरून दोन लहान मुलांना घेऊन येणारा आरोपी अनिकेत आत्माराम झगडे याने विनाकारण मनीष बांडागळे यांना थांबवून शिवीगाळ व दमदाटी करण्यास सुरुवात केली.

भांडण सोडवायला गेलेल्या भावावर बॅटरीने वार

हा प्रकार घरातून पाहून मनीष यांचा भाऊ दिनेश दीपक बांडागळे (वय ३१ वर्षे) हा भांडण सोडवण्यासाठी घटनास्थळी धावून आला. दरम्यान, आरोपी अनिकेत याने बोलावून घेतलेला दुसरा आरोपी धर्मेंद्र तानाजी भोपळकर याने हातात असलेली दुचाकीची छोटी बॅटरी दिनेश याच्या कपाळावर उजव्या बाजूस मारून त्याला गंभीर जखमी केले.

तसेच तिसऱ्या आरोपी सौ. प्रियंका प्रकाश भोपळकर यांनी फिर्यादी व त्यांच्या आईला “आम्ही येथील खोत आहोत, तुमचे पूर्ण खानदान संपवून टाकीन” अशी गलिच्छ शिवीगाळ करत जीवे मारण्याची धमकी दिली.

देवरूख पोलीस ठाण्यात गुन्हा दाखल

या घटनेनंतर जखमी दिनेश बांडागळे यांच्यावर वैद्यकीय उपचार करण्यात आले. ५ ऑगस्ट २०२६ रोजी रात्री १२:१३ वाजेच्या सुमारास मनीष बांडागळे यांनी देवरूख पोलीस ठाण्यात तक्रार दाखल केली.

त्यांच्या तक्रारीवरून देवरूख पोलिसांनी तिन्ही आरोपींविरोधात भारतीय न्याय संहिता (BNS) २०२३ चे कलम ११८(१), ११५(२), ३२४(२), ३५२, ३५१(२) आणि ३(५) अन्वये गु.र.नं. १२०/२०२६ नुसार गुन्हा दाखल केला आहे.

आरोपींची नावे: १) अनिकेत आत्माराम झगडे

२) धर्मेंद्र तानाजी भोपळकर

३) सौ. प्रियंका प्रकाश भोपळकर (सर्व रा. साडवली सह्याद्रीनगर, अष्टविनायक गल्ली, ता. संगमेश्वर, जि. रत्नागिरी)

या प्रकरणाचा पुढील अधिक तपास देवरूख पोलीस करत आहेत.