जिल्ह्यातील सहकारी संस्थांचे सक्षमीकरण आणि युवकांसाठी रोजगाराच्या संधींवर सखोल चर्चा
रत्नागिरी जिल्हा सहकारी बोर्डाचे अध्यक्ष हेमंत वणजू यांनी सहकारी संस्था रत्नागिरीचे नवनिर्वाचित जिल्हा उपनिबंधक राम कुलकर्णी यांची सदिच्छा भेट घेतली. राम कुलकर्णी यांनी नुकताच रत्नागिरी जिल्ह्याचा पदभार स्वीकारल्याबद्दल त्यांचे स्वागत करण्यात आले. या भेटीदरम्यान जिल्हा उपनिबंधकांनी जिल्ह्यातील सहकारी चळवळीचा सविस्तर आढावा घेतला.
या वेळी जिल्हा सहकारी बोर्डाचे माजी अध्यक्ष प्रभाकर शेट्ये आणि बोर्डाचे मुख्याधिकारी कळंत्रे हेदेखील उपस्थित होते.
चर्चेतील प्रमुख मुद्दे व मार्गदर्शन
१. प्रमाणित लेखापरीक्षकांसाठी प्रशिक्षण: जिल्ह्यातील प्रमाणित लेखापरीक्षकांसाठी (Certified Auditors) विशेष प्रशिक्षण वर्ग आयोजित करण्याबाबत सकारात्मक चर्चा झाली. २. गृहनिर्माण संस्थांसाठी उपक्रम: जिल्ह्यातील गृहनिर्माण सहकारी संस्थांचे (Housing Societies) कामकाज अधिक पारदर्शक व सुलभ व्हावे, यासाठी स्वतंत्र प्रशिक्षण कार्यक्रम राबवण्याचे निश्चित करण्यात आले. ३. युवकांसाठी रोजगार आणि सहकार क्षेत्र: जिल्ह्यातील तरुण वर्गाला रोजगाराच्या नव्या संधी उपलब्ध करून देण्यासाठी त्यांना सहकार क्षेत्राचे योग्य प्रशिक्षण देणे अत्यंत गरजेचे आहे, यावर भर देण्यात आला. ४. सहकारातून पर्यटन विकास: कोकणात पर्यटन व्यवसाय मोठ्या प्रमाणावर विकसित होत आहे. त्यामुळे तरुण वर्गाने सहकाराच्या माध्यमातून एकत्र येत पर्यटन क्षेत्राचा विकास करावा आणि स्वतःचे उद्योग उभे करावेत, असे मोलाचे मार्गदर्शन जिल्हा उपनिबंधक राम कुलकर्णी यांनी केले.
