टपाल विभाग व एमजीएलचा सामंजस्य करार
रत्नागिरी:
Ratnagiri Post Office New Services बाबत मिळालेल्या माहितीनुसार, रत्नागिरी शहरातील महानगर गॅस लि. (MGL) च्या ग्राहकांसाठी भारतीय टपाल विभागाने एक अत्यंत महत्त्वाची आणि दिलासादायक सुविधा सुरू केली आहे. आता शहरातील सर्व पोस्ट ऑफिसमध्ये महानगर गॅसची मासिक बिले स्वीकारली जाणार असून, या निर्णयाचा फायदा शहरातील सुमारे १०,००० हून अधिक ग्राहकांना होणार आहे.
शहराच्या विविध भागांत राहणाऱ्या नागरिकांना पूर्वी गॅस बिल भरण्यासाठी दूरवर जावे लागत होते. नागरिकांची ही गैरसोय लक्षात घेऊन महानगर गॅस आणि भारतीय डाक विभाग यांच्यात १० ऑगस्ट रोजी अधिकृत सामंजस्य करार (MoU) करण्यात आला. या करारावर रत्नागिरी विभागाचे टपाल अधीक्षक ज्ञानेश कुलकर्णी आणि महानगर गॅस लिमिटेडचे जीएम हेड आशिष प्रसाद यांनी स्वाक्षऱ्या केल्या.
या करारा मुळे रत्नागिरी प्रधान डाकघर, कलेक्टरेट, शिवाजीनगर, एमआयडीसी यासह शहरातील सर्व पोस्ट ऑफिसमध्ये ही बिल भरणा सुविधा तात्काळ लागू झाली असून ग्राहकांचा वेळ आणि प्रवासाचा खर्च वाचणार आहे.
Ratnagiri Post Office New Services: जिल्ह्यातील पोस्ट ऑफिसमध्ये आधार नोंदणी आणि अपडेट वेगात
महानगर गॅस बिलांसोबतच रत्नागिरी जिल्ह्यातील सर्व प्रमुख पोस्ट ऑफिसमध्ये आधार कार्ड नोंदणी (New Registration) आणि अद्ययावतीकरणाचे (Update) काम वेगाने सुरू आहे. शासकीय योजना, बँकिंग, शाळा-कॉलेज प्रवेश यांसाठी आधार कार्ड अत्यंत आवश्यक असल्याने नागरिक टपाल केंद्रांना प्राधान्य देत आहेत.
- आकडेवारी: चालू वर्षात टपाल विभागाच्या प्रशिक्षित कर्मचाऱ्यांमार्फत ५,५८४ विद्यार्थी आणि ५५२ नागरिकांना आधारविषयक सेवा देण्यात आल्या आहेत.
- विशेष आधार कॅम्प सुविधा: एकाच वेळी ४० पेक्षा जास्त नागरिकांसाठी किंवा विद्यार्थ्यांसाठी विशेष कॅम्प आयोजित करायचा असल्यास ८६६९९१९८६० या व्हॉट्सॲप क्रमांकावर संदेश पाठवण्याचे आवाहन करण्यात आले आहे.
- उपलब्ध ठिकाणे: रत्नागिरी प्रधान डाकघर, राजापूर, देवरुख, लांजा, साखळी, संगमेश्वर, सैतवडा, पाली, खारेपाटण यासह जिल्ह्यातील अनेक पोस्ट ऑफिसमध्ये नवीन नोंदणी, बायोमेट्रिक सुधारणा, नाव व मोबाईल क्रमांक बदलण्याची सुविधा उपलब्ध आहे.
रक्षाबंधन सणासाठी विशेष तयारी; अवघ्या १२ रुपयांत वॉटरप्रूफ राखी पाकिटे
येत्या २८ ऑगस्ट रोजी होणाऱ्या रक्षाबंधन सणाच्या पार्श्वभूमीवर रत्नागिरी टपाल विभाग भावा-बहिणीचे प्रेम सुरक्षितपणे पोहोचवण्यासाठी पूर्णपणे सज्ज झाला आहे.
- दूर राहणाऱ्या भावांपर्यंत राखी सुरक्षित पोहोचवण्यासाठी जिल्ह्यातील सर्व पोस्ट ऑफिसमध्ये विशेष रंगीत राखी पाकिटे अवघ्या १२ रुपयांत विक्रीसाठी उपलब्ध करण्यात आली आहेत.
- गतवर्षीचा विक्रम: गेल्या वर्षी टपाल विभागाने १८,७५२ राखी पाकिटांची विक्री केली होती. साध्या पोस्टाने २८,७५९ तर स्पीड पोस्ट व रजिस्ट्रीने ७,६५४ राख्या देशांतर्गत पाठवण्यात आल्या होत्या.
- परदेशातही प्रेम: अमेरिका, रशिया, युरोप आणि आखाती देशांमध्ये १०० हून अधिक राख्या पाठवून परदेशातही सेवा पुरवण्यात आली होती.
- जवानांसाठी राखी: चालू वर्षात शाळांना भेटी देऊन ‘जवानांसाठी राखी’ हा विशेष उपक्रमही राबवला जात आहे.
बहिणींनी वेळेत व सुरक्षितपणे राखी पाठवण्यासाठी जवळच्या पोस्ट ऑफिसच्या या सर्व सुविधांचा लाभ घ्यावा, असे संयुक्त आवाहन अधीक्षक ज्ञानेश कुलकर्णी आणि एमजीएलचे जीएम आशिष प्रसाद यांनी केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:19 11-08-2026
