सुसज्ज इमारतींच्या बांधकामाला गती मिळणार
चिपळूण:
Guhagar Rampur Hospital Land Issue बाबत मिळालेल्या वृत्तानुसार, गुहागर विधानसभा मतदारसंघातील श्रेणीवर्धित ग्रामीण रुग्णालयांच्या प्रलंबित प्रश्नांना आता मोठी गती मिळाली आहे. आमदार भास्कर जाधव यांच्या मागणीनुसार राज्याचे आरोग्य संचालक डॉ. विजय कंदेवाड यांनी गुहागर आणि रामपूर (ता. चिपळूण) येथील ग्रामीण रुग्णालयांची प्रत्यक्ष पाहणी केली. या दोन्ही रुग्णालयांच्या जागेचा प्रलंबित प्रश्न सुटल्याची माहिती त्यांनी आमदार जाधव यांची भेट घेऊन दिली.
गुहागर मतदारसंघातील ग्रामीण रुग्णालयांच्या प्रश्नांवर स्वतंत्र बैठक घेण्याची मागणी आमदार भास्कर जाधव यांनी आरोग्यमंत्री प्रकाश आबिटकर यांच्याकडे केली होती. त्यानुसार पावसाळी अधिवेशनादरम्यान विधानभवनात बैठक घेण्यात आली होती.
Guhagar Rampur Hospital Land Issue: आरोग्यमंत्र्यांकडून निधीचे आश्वासन; वावे रुग्णालयाचा प्रश्नही मार्गी
या बैठकीत वावे (ता. खेड) ग्रामीण रुग्णालयाच्या इमारत बांधकामासाठी आवश्यक निधी उपलब्ध करून देण्याबाबत तातडीने मुख्यमंत्र्यांकडे प्रस्ताव पाठविण्याचे आश्वासन आरोग्यमंत्र्यांनी दिले होते. तसेच रामपूर व गुहागर ग्रामीण रुग्णालयांच्या जागेचा प्रश्न प्रत्यक्ष पाहणी करून सोडविण्याच्या सूचना आरोग्य संचालक डॉ. कंदेवाड यांना देण्यात आल्या होत्या. त्यानुसार त्यांनी दोन्ही ठिकाणी भेट देऊन जागेची पाहणी केली.
रुग्णालयांसाठी आवश्यक जागा ताब्यात घेऊन ती शासनाच्या नावावर करण्यासाठी ठराव करून घेण्याची जबाबदारी आमदार भास्कर जाधव यांनी स्वीकारली होती. त्यानुसार संबंधितांशी संपर्क साधून ही प्रक्रिया सुरू करण्यात आली आहे. त्यामुळे गुहागर व रामपूर रुग्णालयांच्या जागेचा प्रश्न मार्गी लागला आहे.
वावे ग्रामीण रुग्णालयाशी संबंधित प्रश्न यापूर्वीच मार्गी लागला असून, इमारतीच्या बांधकामासाठी निधी उपलब्ध झाल्यानंतर या तिन्ही रुग्णालयांच्या सुसज्ज इमारती उभारण्यास गती मिळणार आहे. यामुळे मतदारसंघातील ग्रामीण भागातील नागरिकांना अधिक सक्षम आरोग्य सुविधा मिळण्याची अपेक्षा आहे.
या पाहणीवेळी जिल्हा शल्यचिकित्सक डॉ. भास्कर जगताप, जिल्हा आरोग्य अधिकारी डॉ. अनिरुद्ध आठल्ये, वैद्यकीय अधीक्षक डॉ. विजयकुमार कांबळे, डॉ. बळवंत, चिपळूण तालुका आरोग्य अधिकारी डॉ. ज्योती यादव यांच्यासह आरोग्य विभागाचे अधिकारी उपस्थित होते
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:33 11-08-2026
