पाचही विधानसभा मतदारसंघांतील प्रस्तावित बदलांची माहिती; १,३०० पेक्षा जास्त मतदार असलेल्या केंद्रांवर फेररचना
रत्नगिरी:
मतदार यादी विशेष सखोल पुनरीक्षण कार्यक्रम २०२६ अंतर्गत रत्नागिरी जिल्ह्यातील मतदान केंद्रांच्या सुसूत्रीकरणाबाबत जिल्हाधिकारी मनुज जिंदल यांच्या उपस्थितीत प्रमुख राजकीय पक्षांची महत्त्वपूर्ण बैठक पार पडली. या बैठकीत निवडणूक अधिकारी राहुल गायकवाड यांनी जिल्ह्यातील पाचही विधानसभा मतदारसंघांमध्ये मतदान केंद्रांच्या सुसूत्रीकरणासाठी प्रस्तावित करण्यात आलेल्या विविध बदलांची सविस्तर माहिती राजकीय पक्षांच्या प्रतिनिधींना दिली.
मतदान केंद्रांची संख्या कायम; १,३०० पेक्षा जास्त मतदार असलेल्या केंद्रांचे समायोजन
जिल्ह्यातील पाच विधानसभा मतदारसंघांमध्ये मतदान केंद्रांची एकूण संख्या कायम राहणार असल्याचे बैठकीत स्पष्ट करण्यात आले. मात्र, ज्या मतदान केंद्रांवर १,३०० पेक्षा अधिक मतदार आहेत, तेथे केंद्रीय निवडणूक आयोगाच्या निर्देशांनुसार आवश्यकतेनुसार नवीन केंद्र तयार करणे किंवा मतदारांचे जवळच्या इतर केंद्रांमध्ये समायोजन करण्यासाठी काही भागांची फेररचना करण्यात आली आहे.
विधानसभा मतदारसंघनिहाय करण्यात आलेले बदल
जिल्ह्यातील वेगवेगळ्या विधानसभा मतदारसंघांमध्ये स्थानिक परिस्थितीनुसार पुढीलप्रमाणे बदल प्रस्तावित करण्यात आले आहेत:
दापोली विधानसभा मतदारसंघ: पांढरी व हर्णे येथील मतदान केंद्रांमधील काही विभागांची फेररचना करण्यात आली आहे. तसेच वणौशीत नातू मतदान केंद्राला जोडलेले मतदार सोंडेघर महसुली गावातील असल्याने या केंद्राचे नाव आता ‘सोंडेघर’ करण्यात येणार आहे.
चिपळूण विधानसभा मतदारसंघ: जुन्या इमारती मोडकळीस आल्याने पेढे कोष्टेवाडी, शिरगाव, कसबा इत्यादी मतदान केंद्रांच्या मूळ स्थळात बदल करण्यात आला आहे. शाळा बंद झाल्याने तिवडी, तर मतदारसंघाचे अंतर लक्षात घेऊन खडपोली येथील केंद्राच्या स्थळातही सुधारणा करण्यात आली आहे.
रत्नागिरी विधानसभा मतदारसंघ: जुनी इमारत निर्लेखित (Demolished/Condemned) झाल्यामुळे नगर परिषद वॉर्ड क्रमांक ८ व ९ येथील मतदान केंद्रांच्या स्थळात बदल करण्यात आला आहे.
राजापूर विधानसभा मतदारसंघ: प्रिंदावण येथील मतदान केंद्राची इमारत निर्लेखित झाल्याने त्या केंद्राचे स्थळही बदलण्यात आले आहे.
राजकीय पक्षांचे प्रतिनिधी उपस्थित; मते व सूचना जाणून घेत निर्णय
जिल्हाधिकारी कार्यालयात पार पडलेल्या या बैठकीला जिल्ह्यातील विविध राजकीय पक्षांचे अधिकृत प्रतिनिधी उपस्थित होते. निवडणूक प्रशासनातर्फे सर्व प्रस्तावित बदलांबाबत उपस्थितांना सविस्तर माहिती देण्यात आली आणि या बदलांबाबत सर्व पक्षीय प्रतिनिधींची मते व सूचना प्रत्यक्ष जाणून घेण्यात आल्या.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:28 12-08-2026
