पायलटच्या प्रसंगावधानामुळे उड्डाण थांबवले; सखोल चौकशी करण्याची शिवसैनिकांची मागणी
नागपूरहून गडचिरोलीकडे रवाना होत असताना राज्याचे उद्योगमंत्री उदय सामंत यांच्या हेलिकॉप्टरमध्ये अचानक तांत्रिक बिघाड झाल्याची घटना समोर आली आहे. हेलिकॉप्टर टेक-ऑफ घेत असतानाच ही बाब वैमानिकाच्या (पायलट) लक्षात आल्याने त्यांनी तातडीने उड्डाण थांबवले. वैमानिकाच्या समयसूचकतेमुळे संभाव्य मोठा अनर्थ टळला आहे.
पायलटच्या सतर्कतेमुळे मोठा अनर्थ टळला
उद्योगमंत्री उदय सामंत हे नागपूरवरून गडचिरोली दौऱ्यासाठी हेलिकॉप्टरने प्रवास करणार होते. मात्र, टेक-ऑफच्या ऐनवेळी हेलिकॉप्टरमध्ये तांत्रिक अडचण निर्माण झाल्याचे वैमानिकाने पाहिले आणि क्षणाचाही विलंब न लावता उड्डाण रद्द केले. या सतर्कतेमुळे विमानातील सर्व प्रवासी पूर्णपणे सुरक्षित राहिले आहेत.
तांत्रिक तपासणीबाबत चौकशीची मागणी
या घटनेनंतर स्थानिक शिवसैनिकांनी तीव्र चिंता व्यक्त केली आहे. हेलिकॉप्टरच्या उड्डाणापूर्वी नियमितपणे केली जाणारी तांत्रिक तपासणी (Checkup) योग्य प्रकारे झाली होती की नाही, आणि उड्डाणापूर्वी हा बिघाड का लक्षात आला नाही, याची सखोल चौकशी करण्यात यावी, अशी जोरदार मागणी शिवसैनिकांकडून केली जात आहे.
