कौटुंबिक वादातून झाला होता प्रकार; रत्नागिरी शहर पोलिसांत अदखलपात्र (NC) गुन्हा दाखल
रत्नागिरी शहरातील मारुती मंदिर परिसरातील नॅशनल मेडिकल शेजारी असलेल्या ‘कस्तुरी चायनिज सेंटर’ येथे एका महिलेला बंदुकीचा धाक दाखवून धमकावण्यात आल्याची माहिती समोर आली होती. मात्र, पोलिसांनी तातडीने घटनास्थळी धाव घेऊन तपास केला असता, ती खरी बंदूक नसून हवेच्या दाबावर चालणारी खेळण्यातील बंदूक (Toy Arm) असल्याचे निष्पन्न झाले आहे.
कौटुंबिक वादातून शिवीगाळ व धमकी
११ ऑगस्ट २०२६ रोजी सकाळी ११:३० वाजेच्या सुमारास कस्तुरी चायनिज सेंटर येथे साजिदा समीर काझी (वय ४० वर्षे, रा. कोहिनूर प्लाझा, मारुती मंदिर, रत्नागिरी) या उपस्थित होत्या.
त्यावेळी त्यांचे नातेवाईक – १) नसीरा हरीस शेख, २) हरीस आदम शेख, आणि ३) संजय वासुदेव पुनतळेकर (सर्व रा. ए-३७, ओसवाल नगर, रत्नागिरी) हे त्या ठिकाणी आले. त्यांच्यात आपापसात कौटुंबिक कारणावरून वाद झाला. या वादादरम्यान गैरतक्रारदारांनी तक्रारदार महिलेला शिवीगाळ करत बंदुकीसारख्या वस्तूचा धाक दाखवून धमकावले.
तज्ज्ञांकडून तपासणी अन् सत्य समोर
घटनेची माहिती मिळताच पोलीस अधीक्षक नितीन दत्तात्रय बगाटे व अपर पोलीस अधीक्षक बी.बी. महामुनी यांच्या मार्गदर्शनाखाली रत्नागिरी शहर पोलिसांचे पथक तात्काळ घटनास्थळी रवाना झाले.
- खेळण्यातील बंदूक जप्त: पोलिसांनी घटनास्थळावरून बंदुकीसदृश वस्तू ताब्यात घेतली.
- हवेच्या दाबावरील टॉय आर्म: तज्ज्ञांमार्फत करण्यात आलेल्या तपासणीत सदर वस्तू ही केवळ हवेच्या दाबावर चालणारी खेळण्यातील बंदूक असल्याचे स्पष्ट झाले.
अदखलपात्र गुन्हा दाखल; अफवांवर विश्वास न ठेवण्याचे आवाहन
या प्रकरणी रत्नागिरी शहर पोलीस ठाण्यात अदखलपात्र (NC) गुन्हा दाखल करण्यात आला असून पोलीस पुढील कायदेशीर कारवाई करत आहेत.
सदर घटनेबाबत सोशल मीडिया किंवा इतर कोणत्याही माध्यमांवरून पसरणाऱ्या अपूर्ण माहिती अथवा अफवांवर नागरिकांनी अजिबात विश्वास ठेवू नये, असे स्पष्ट आवाहन रत्नागिरी जिल्हा पोलीस दलाच्या वतीने करण्यात आले आहे.
