उच्च न्यायालयाच्या आदेशानंतर हालचालींना वेग; १८०० मेट्रिक टन गॅस साठवणुकीच्या प्रश्नावर प्रशासनाचा टप्प्याटप्प्याने मार्ग
रत्नागिरी: Jaigad Port News अंतर्गत जयगड बंदरात गेल्या तीन महिन्यांपासून अडकून पडलेल्या वादग्रस्त ‘आमिर’ गॅसवाहू जहाजाबाबत एक मोठी घडामोडी समोर आली आहे. जहाजावरील तब्बल १८०० मेट्रिक टन गॅस एकाच वेळी साठवण्याचे मोठे आव्हान उभे राहिल्याने, प्रशासनाने अत्यंत सावध भूमिका घेतली आहे. पहिल्या टप्प्यात या जहाजातून १५० टन गॅस रिकामा करण्याचे नियोजन सुरू करण्यात आले आहे.
बोगस कागदपत्रांच्या आधारे पाकिस्तानकडे नेण्याचा होता प्रयत्न
इराक येथून एलपीजी (LPG) गॅस भरून निघालेले हे ‘आमिर’ जहाज बोगस कागदपत्रांच्या आधारे आणि मूळ मालकाच्या नकळत पाकिस्तानकडे नेण्याचा प्रयत्न करण्यात आल्याचे तपासात उघडकीस आले होते. या गंभीर आंतरराष्ट्रीय प्रकरणाची दखल घेत न्यायालयाने हे जहाज जप्त करून जयगड बंदरातील जेएसडब्ल्यू पोर्टच्या (JSW Port) जेटीवर ठेवण्याचे आदेश दिले होते.
उच्च न्यायालयाची दणकेबाज कारवाई आणि जेएसडब्ल्यूची याचिका
तब्बल अडीच ते तीन महिने हे जहाज जेटीवर उभे राहिल्यामुळे जेएसडब्ल्यू पोर्टवर येणाऱ्या इतर व्यावसायिक जहाजांच्या वाहतुकीत मोठा अडथळा निर्माण झाला होता. सुरक्षेचा प्रश्न आणि व्यावसायिक अडचणी लक्षात घेऊन जेएसडब्ल्यू पोर्टने मुंबई उच्च न्यायालयात याचिका दाखल केली होती.
या याचिकेवर सुनावणी करताना उच्च न्यायालयाने जहाजमालकाला साडेनऊ कोटी रुपये भरण्याचे किंवा जहाजावरील गॅस रिकामा करून जहाज मूळ मालकाच्या ताब्यात देण्याचे निर्देश दिले. न्यायालयाच्या या आदेशानंतर बंदर विभाग आणि प्रशासकीय पातळीवर गॅस उतरवण्याच्या हालचालींना अचानक वेग आला.
१८०० टन साठवणुकीचा प्रश्न; टप्प्याटप्प्याने काढणार गॅस
जहाजावर १८०० मेट्रिक टन एवढा प्रचंड गॅस उपलब्ध असल्याने तो एकाच वेळी कुठे साठवायचा, असा बिकट प्रश्न जिल्हा प्रशासन आणि बंदर विभागासमोर निर्माण झाला होता. यावर तोडगा म्हणून संपूर्ण गॅस एकाच वेळी न उतरवता टप्प्याटप्प्याने उतरवण्याचा निर्णय घेण्यात आला आहे. त्यानुसार पहिल्या टप्प्यात १५० टन गॅस बाहेर काढण्याचे नियोजन केले जात आहे. उच्च न्यायालयाच्या निर्देशानुसार बंदर विभाग आणि जेएसडब्ल्यू कंपनीकडून सध्या जयगड बंदरात याचे सूक्ष्म नियोजन सुरू असून, लवकरच प्रत्यक्ष कामाला सुरुवात होईल. यामुळे जयगड बंदरातील वाहतुकीचा अडथळा दूर होण्यास मदत होणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:38 14-08-2026
