जन्मठेपेच्या शिक्षेला स्थगिती; उच्च न्यायालयाच्या निर्णयाविरोधात सर्वोच्च न्यायालयात अपील करणार: हमीद दाभोलकर
मुंबई / पुणे:
महाराष्ट्र अंधश्रद्धा निर्मूलन समितीचे (अंनिस) संस्थापक डॉ. नरेंद्र दाभोलकर यांच्या हत्याप्रकरणात मुंबई उच्च न्यायालयाने एक महत्त्वपूर्ण निकाल दिला आहे. न्यायालयाने या प्रकरणातील मुख्य आरोपी सचिन अंदुरे याला जामीन मंजूर केला असून त्याच्या जन्मठेपेच्या शिक्षेलाही तात्पुरती स्थगिती दिली आहे.
न्यायमूर्ती सारंग कोतवाल आणि न्यायमूर्ती रणजितसिंह भोसले यांच्या खंडपीठाने हा निर्णय दिला आहे. यापूर्वी एप्रिल महिन्यात सहआरोपी शरद कळसकर याला जामीन मंजूर झाला होता, त्यापाठोपाठ आता मुख्य आरोपी अंदुरेलाही जामीन मिळाला आहे.
दाभोलकर कुटुंबीय सर्वोच्च न्यायालयात जाणार
उच्च न्यायालयाच्या या निर्णयावर प्रतिक्रिया देताना डॉ. नरेंद्र दाभोलकर यांचे चिरंजीव डॉ. हमीद दाभोलकर यांनी सांगितले की, “हा न्यायालयाचा निर्णय असून त्याबाबत कायदेशीर सविस्तर माहिती घेऊन आम्ही सर्वोच्च न्यायालयात अपील करणार आहोत. यापूर्वी शरद कळसकरला जामीन मिळाला होता, त्याविरोधातही आम्ही सर्वोच्च न्यायालयात याचिका दाखल केली आहे.”
तपासाचा आणि खटल्याचा घटनाक्रम
| घटना / टप्पा | माहिती व तपशील |
| हत्याकांड (२० ऑगस्ट २०१३) | पुण्यात ओंकारेश्वर जवळील महर्षी विठ्ठल रामजी शिंदे पुलावर मॉर्निंग वॉक करताना दुचाकीवरून आलेल्या दोघांनी गोळ्या झाडून हत्या केली. |
| तपासाचे हस्तांतरण (२०१४) | सुरुवातीला पुणे पोलिसांकडे असलेला तपास मुंबई उच्च न्यायालयाच्या आदेशानंतर सीबीआयकडे (CBI) वर्ग. |
| विशेष न्यायालयाचा निकाल (१० मे २०२४) | पुण्यातील विशेष न्यायालयाने सचिन अंदुरे व शरद कळसकर यांना दोषी ठरवून जन्मठेपेची शिक्षा आणि ₹५ लाखांचा दंड सुनावला. |
| निर्दोष मुक्तता | पुराव्याअभावी कथित सूत्रधार डॉ. वीरेंद्रसिंह तावडे, संजीव पुनाळेकर आणि विक्रम भावे यांची मुक्तता. |
| उच्च न्यायालयाची कारवाई | शरद कळसकरनंतर आता मुख्य आरोपी सचिन अंदुरे यालाही उच्च न्यायालयाकडून जामीन मंजूर व शिक्षेला स्थगिती. |
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:23 18-08-2026
