रामायण-महाभारत प्रश्नमंजूषा, गीता पठण आणि स्तोत्रपठणाचा समावेश
रत्नागिरी
संस्कृत सप्ताहाचे औचित्य साधून कविकुलगुरू कालिदास संस्कृत विश्वविद्यालयाचे विस्तार सेवा मंडळ तसेच भारतरत्न डॉ. पांडुरंग वामन काणे संस्कृत अध्ययन केंद्र, रत्नागिरी उपकेंद्राच्या वतीने बुधवार, दि. २ सप्टेंबर रोजी विविध विविध गुणदर्शनाचा व ज्ञानवर्धक स्पर्धांचे आयोजन करण्यात आले आहे. या स्पर्धा रत्नागिरी एस.टी. बस स्थानकासमोरील अरिहंत मॉलच्या तिसऱ्या मजल्यावर असलेल्या रत्नागिरी उपकेंद्रामध्ये पार पडणार आहेत.
विविध स्पर्धा आणि त्यांचे वेळापत्रक
रत्नागिरी उपकेंद्रात दुपारी २ वाजेपासून एकापाठोपाठ एक अशा चार वेगवेगळ्या स्पर्धा पार पडणार आहेत:
- प्रश्नमंजूषा स्पर्धा (दुपारी २ ते ३): रामायण, महाभारत, पुराणे, इतिहास व सामान्यज्ञानावर आधारित ही स्पर्धा असेल. यामध्ये शालेय गटासाठी ४ विद्यार्थी आणि १ शिक्षक अशा ५ जणांच्या संघाला भाग घेता येईल.
- गीता पठण स्पर्धा (दुपारी ३ ते ४): भगवद्गीतेचा पंधरावा अध्याय संपूर्ण, स्पष्ट व अस्खलितपणे सादर करायचा आहे.
- संस्कृत गीतगायन स्पर्धा (सायंकाळी ४ ते ५): ३ ते ५ मिनिटांत संस्कृत गीत स्वर आणि तालबद्ध रीतीने सादर करावे लागेल.
- स्तोत्रपठण स्पर्धा (सायंकाळी ४ ते ५): या स्पर्धेसाठी ‘महागणेशपञ्चरत्नस्तोत्र’ तोंडपाठ असणे आवश्यक आहे.
प्रश्नमंजूषा, गीता पठण आणि गीतगायन स्पर्धेसाठी शालेय गट (इयत्ता ५ वी ते ९ वी) आणि खुला गट असे दोन स्वतंत्र विभाग असतील, तर स्तोत्रपठण स्पर्धेत विद्यार्थी गट आणि खुला गट अशा दोन श्रेणींमध्ये स्पर्धा रंगेल.
नावनोंदणी आणि संपर्काची माहिती
या सर्व स्पर्धांचे पारितोषिक वितरण त्याच दिवशी सायंकाळी ५ वाजता पार पडणार आहे. संस्कृत भाषेचा प्रसार व्हावा आणि विद्यार्थ्यांमधील कलागुणांना वाव मिळावा, यासाठी जास्तीत जास्त संस्कृतप्रेमींनी यात सहभागी व्हावे, असे आवाहन रत्नागिरी उपकेंद्राचे संचालक डॉ. दिनकर मराठे यांनी केले आहे.
स्पर्धेत सहभागी होण्यासाठी इच्छुकांनी https://forms.gle/oF8kiVVVA3XofrxEA या गुगल फॉर्म लिंकवर आपली नोंदणी करावी. अधिक माहितीसाठी प्रा. अविनाश चव्हाण (8390854926) किंवा प्रा. स्वरूप काणे (7219054097) यांच्याशी संपर्क साधावा.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:13 27-08-2026
