आंबा घाट बंद असल्याने वाढला ताण; अवजड वाहनांवर बंदी घालण्याची नागरिकांची मागणी
राजापूर: अणूस्कुरा घाटात बंद पडलेला चौदा चाकी अवजड ट्रक मंगळवार सायंकाळपासून तब्बल २४ तास उलटूनही पूर्णपणे हटवण्यात प्रशासनाला यश आलेले नाही. रत्नागिरी जिल्ह्यातील राजापूर तालुक्यातील या अत्यंत महत्त्वाच्या घाटमार्गात अवघड वळणावर ट्रक अडकल्यामुळे वाहतुकीचा खोळंबा झाला आहे. पोलीस प्रशासनाने अथक प्रयत्नांनंतर ट्रकला काहीसा बाजूला करून दुतर्फा एकेरी मार्ग उपलब्ध करून दिला असला, तरी घाटातील धोकादायक अडथळ्यामुळे सुरक्षेचा गंभीर प्रश्न निर्माण झाला आहे. आगामी गणेशोत्सवाच्या पार्श्वभूमीवर कोकणात येणाऱ्या चाकरमान्यांच्या सुरक्षिततेचा विचार करता या मार्गावरील अवजड वाहतूक तातडीने बंद करावी, अशी जोरदार मागणी स्थानिक नागरिकांमधून जोर धरू लागली आहे.
अवघड वळणावर चौदा चाकी ट्रकचा अडथळा
मंगळवारी सायंकाळी साडेपाचच्या सुमारास अणूस्कुरा घाटातील एका तीव्र आणि अवघड वळणावर चौदा चाकी अवजड ट्रक अचानक बंद पडला. या घटनेची माहिती मिळताच रायपाटण पोलीस ठाणे आणि अणूस्कुरा चेकपोस्टवरील अधिकारी व कर्मचार्यांनी तातडीने घटनास्थळी धाव घेतली. रात्री उशिरापर्यंत क्रेन आणि अन्य यंत्रणांच्या साहाय्याने ट्रक बाजूला करण्याचे प्रयत्न सुरू होते.
मात्र, वळणाचा टप्पा कठीण असल्याने ट्रक पूर्णपणे रस्त्यावरून हटवणे शक्य झाले नाही. सुरुवातीला प्रशासनाने ट्रक किंचित बाजूला करून केवळ अल्टो, वॅगनआर यांसारख्या लहान चारचाकी आणि दुचाकी वाहनांनाच मार्ग काढून दिला होता. त्यामुळे मोठी वाहने आणि एसटी गाड्यांची वाहतूक काही काळ पूर्णपणे ठप्प झाली होती.
आंबा घाटाच्या बंदीमुळे अणूस्कुरा घाटावर प्रचंड ताण
गेल्या काही दिवसांपासून आंबा घाट अवजड वाहतुकीसाठी पूर्णपणे बंद ठेवण्यात आला आहे. परिणामी, त्या मार्गावरील संपूर्ण अवजड वाहतूक अणूस्कुरा घाटाकडे वळवण्यात आली आहे. सध्या या अरुंद घाटातून जळाऊ लाकूड वाहून नेणारी मोठी वाहने, गॅस सिलिंडरची वाहने आणि पेट्रोल-डिझेलचे टँकर मोठ्या प्रमाणावर धावत आहेत. क्षमतेपेक्षा जास्त आणि अवजड वाहनांची सततची वर्दळ यामुळे या घाटमार्गावर प्रचंड ताण आला असून अपघाताची शक्यता वाढली आहे.
अणूस्कुरा घाटात चाकरमान्यांची गर्दी आणि अपघाताची भीती
काही दिवसांवर येऊन ठेपलेल्या गणेशोत्सवामुळे मुंबई, ठाणे आणि पुणे परिसरातून कोकणात येणाऱ्या चाकरमान्यांची संख्या मोठी असणार आहे. बहुतांश नागरिक अणूस्कुरा मार्गाचा वापर प्राधान्याने करतात. अशा वेळी घाटात अवजड वाहतूक सुरू राहिल्यास आणि त्याच वेळी चाकरमान्यांच्या वाहनांची गर्दी झाल्यास घाटात किलोमीटरच्या रांगा लागून वाहतूक कोंडी होण्याची शक्यता आहे. याशिवाय पावसाळ्यात आधीच या घाटात दरडी कोसळणे आणि वाहने बंद पडण्याचे प्रकार घडले असल्याने सुरक्षेचा प्रश्न ऐरणीवर आला आहे.
प्रशासनाकडून कायमस्वरूपी उपाययोजनांची अपेक्षा
चालू पावसाळ्यात अणूस्कुरा घाटाची झालेली दुरवस्था पाहता शासनाने या मार्गावर कायमस्वरूपी आणि प्रभावी उपाययोजना करण्याची गरज निर्माण झाली आहे. गणेशोत्सवाच्या काळात अवजड वाहतुकीचे कडक नियमन करणे, आपत्कालीन मदतीसाठी क्रेनसारखी यंत्रणा घाटात सज्ज ठेवणे आणि बंद पडलेली वाहने तातडीने बाजूला हटवण्याची व्यवस्था करणे आवश्यक आहे. चाकरमान्यांचा प्रवास सुखकर आणि सुरक्षित व्हावा यासाठी प्रशासनाने ठोस आणि तातडीचे नियोजन करावे, अशी ठाम अपेक्षा स्थानिक व्यक्त करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:16 27-08-2026
