मुसळधार पावसात अहोरात्र सेवा देणाऱ्या कर्मचाऱ्यांची गैरसोय लक्षात घेऊन केली तातडीने व्यवस्था; कर्मचाऱ्यांनी व्यक्त केले समाधान
देवरूख (संगमेश्वर/रत्नागिरी)
एसटी वाहतुकीसाठी आंबा घाट खुला असल्याने या धोकादायक घाटमार्गातून ये-जा करणाऱ्या एसटी बस चालकांना आवश्यक मार्गदर्शन करणे आणि वाहतूक सुरळीत व सुरक्षित ठेवण्यासाठी एसटी तसेच पोलिस कर्मचारी पावसातही अहोरात्र आपले कर्तव्य बजावत आहेत. मात्र, मुसळधार पावसात या कर्मचाऱ्यांना उभे राहण्यासाठी निवाऱ्याची कोणतीही व्यवस्था नव्हती. ही बिकट परिस्थिती लक्षात येताच आमदार किरण सामंत यांनी तातडीने पावले उचलत आंबा घाटात निवारा शेडची व्यवस्था करून दिली आहे.
कर्मचाऱ्यांची अडचण ओळखत आमदारांची तत्परता
प्रतिकूल हवामानात आणि मुसळधार पावसात रस्त्यावर उभे राहून सेवा बजावणाऱ्या पोलिस आणि एसटी कर्मचाऱ्यांची होणारी हालअपेष्टा लक्षात आल्यानंतर आमदार किरण सामंत यांनी तात्काळ दखल घेतली. त्यांच्या पुढाकारातून निवारा शेड उभारण्यात आल्याने कर्तव्यदक्ष कर्मचाऱ्यांना पाऊस आणि वादळापासून मोठा दिलासा मिळाला आहे. आंबा घाटातील वाहतूक नियंत्रणात ठेवण्यासाठी अधिकारी व कर्मचारी अहोरात्र मेहनत घेत असताना त्यांच्या या मूलभूत गरजेकडे लक्ष दिल्याबद्दल समाधान व्यक्त केले जात आहे.
संवेदनशील आणि तत्पर नेतृत्वाची प्रचिती
मोठ्या विकासकामांसोबतच प्रत्यक्ष मैदानावर (ग्राउंड लेव्हल) काम करणाऱ्या कर्मचाऱ्यांच्या छोट्या-छोट्या अडचणींचीही तातडीने दखल घेणे ही आमदार किरण सामंत यांच्या कार्यशैलीची विशेष ओळख ठरली आहे. जनतेच्या प्रश्नांसोबतच ऑन-ड्यूटी असणाऱ्या कर्मचाऱ्यांच्या सुरक्षिततेची आणि सुविधांची काळजी घेणारे लोकप्रतिनिधी म्हणून त्यांनी पुन्हा एकदा आपली कार्यतत्परता सिद्ध केली आहे. आमदार सामंत यांच्या या संवेदनशील निर्णयाबद्दल आंबा घाटात तैनात असलेल्या एसटी व पोलिस कर्मचाऱ्यांनी मनापासून आभार मानले आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:20 27-08-2026
