माहिती व प्रसारण मंत्रालयाचा निर्णय; बॉलिवूडसह प्रादेशिक कलाकारांना स्थान
CBFC Reconstitutes New Members च्या अंतर्गत केंद्र सरकारने ‘सेन्सॉर बोर्ड’ म्हणून ओळखल्या जाणाऱ्या ‘सेंट्रल बोर्ड ऑफ फिल्म सर्टिफिकेशन’ची (CBFC) पुनर्रचना केली आहे. या फेरबदलांनुसार बोर्डात एकूण १८ नव्या सदस्यांची भर पडली असून, यामध्ये चित्रपट, टेलिव्हिजन आणि प्रादेशिक सिनेसृष्टीतील अनेक दिग्गज व अनुभवी कलाकारांचा समावेश करण्यात आला आहे. यामध्ये बॉलिवूड अभिनेत्री प्रीती झिंटा, अभिनेता पंकज त्रिपाठी, सुनील शेट्टी आणि ज्येष्ठ नाट्यदिग्दर्शक वामन केंद्रे यांसारख्या प्रमुख नावांचा समावेश आहे.
CBFC Reconstitutes New Members: बोर्डात समाविष्ट झालेले १८ नवीन सदस्य
सेन्सॉर बोर्डाच्या नव्या पॅनलमध्ये बॉलिवूडसह प्रादेशिक कलाकारांना आणि विचारवंतांना प्रतिनिधित्व देण्यात आले आहे. या नव्या सदस्यांची यादी खालीलप्रमाणे आहे:
चित्रपट व टीव्ही कलाकार: प्रीती झिंटा, सुनील शेट्टी, पंकज त्रिपाठी, पल्लवी जोशी, रूपाली गांगुली, प्रसेनजित चॅटर्जी (बंगाली अभिनेता), मनोज जोशी.
दिग्दर्शक व संगीतकार: प्रियदर्शन, अभिषेक जैन, नीला पांडा, रिकी केज (तीन वेळा ग्रॅमी पुरस्कार विजेते).
नाट्य, साहित्य व इतर क्षेत्रातील मान्यवर: वामन केंद्रे (नाट्यदिग्दर्शक), रमेश पतंगे (ज्येष्ठ लेखक), विनोद अनुपम, हंसराज हंस, सुप्रिया यारलागड्डा, यतींद्र मिश्रा.
२०१७ नंतर झालेली पहिलीच पुनर्रचना
यापूर्वी सीबीएफसीची पुनर्रचना ऑगस्ट २०१७ मध्ये तीन वर्षांच्या कालावधीसाठी करण्यात आली होती. नियम ३ नुसार नवीन बोर्ड गठित होईपर्यंत विद्यमान सदस्य आपल्या पदावर कायम राहू शकत असल्याने २०२० नंतरही जुनेच पॅनल कार्यरत होते. यापूर्वीच्या पॅनलमध्ये विद्या बालन, विवेक अग्निहोत्री, गौतमी तडीमल्ला, वाणी त्रिपाठी टिकू यांच्यासह वामन केंद्रे आणि रमेश पतंगे यांचा समावेश होता. या नव्या पुनर्रचनेत वामन केंद्रे आणि रमेश पतंगे यांना पुन्हा संधी देण्यात आली आहे.
टीव्ही मालिका ‘अनुपमा’ फेम अभिनेत्री रूपाली गांगुली यांनी २०२४ मध्ये भाजपमध्ये प्रवेश केला होता, तर पल्लवी जोशी यांनी ‘द काश्मीर फाइल्स’ चित्रपटाची निर्मिती केली आहे. या पुनर्रचनेमुळे आता भारतीय चित्रपट प्रमाणीकरण प्रक्रियेत वैविध्यपूर्ण दृष्टिकोन पाहायला मिळणार आहे.
