प्लॅटफॉर्म आणि ट्रेनमधील दरीत जाणाऱ्या प्रवाशाला जवानाने दिले जीवनदान; युवासेनेकडून होमगार्ड रोहित चिले यांचा विशेष नागरी सत्कार
चिपळूण रेल्वे स्थानक देवदूत प्रकरण सध्या कोकण रेल्वे मार्गावर चर्चेचा विषय ठरले असून, एका होमगार्डच्या प्रसंगावधानामुळे मोठा अनर्थ टळला आहे. रेल्वे स्थानकावरची काही क्षणांची असावधानता कशी जीवघेणी ठरू शकते आणि कर्तव्यावर असलेल्या जवानाची सतर्कता एखाद्याचे आयुष्य कसे वाचवू शकते, याचा प्रत्यक्ष प्रत्यय चिपळूण रेल्वे स्थानकावर रात्रीच्या वेळी आला.
मिळालेल्या माहितीनुसार, चिपळूण रेल्वे स्थानकावरील प्लॅटफॉर्म क्रमांक १ वर रात्रपाळीची गस्त घालत असलेले होमगार्ड रोहित चिले हे कर्तव्यावर कार्यरत होते. डबा क्रमांक १५-१६ जवळ धावत्या रेल्वेत चढण्याच्या प्रयत्नात एका प्रवाशाचा अचानक तोल गेला. तो प्रवासी थेट रेल्वे आणि प्लॅटफॉर्ममधील अत्यंत धोकादायक जागेत खेचला जाऊन आत जाण्याच्या स्थितीत होता. हे भीषण दृश्य पाहताच होमगार्ड चिले यांनी क्षणाचाही विलंब न करता त्या दिशेने धाव घेतली आणि स्वतःचा जीव धोक्यात घालून प्रवाशाला सुरक्षितपणे बाहेर ओढले.
काही सेकंदांचा विलंब झाला असता तरी प्रवाशाचा प्राण गेला असता; मात्र रोहित चिले यांच्या सतर्कतेने आणि तत्पर कृतीने संभाव्य दुर्घटना टळली. या उल्लेखनीय कामगिरीची दखल घेत शिवसेना (उद्धव बाळासाहेब ठाकरे) युवासेना चिपळूण शहर यांच्या वतीने रेल्वे स्थानकावर जाऊन होमगार्ड रोहित चिले यांचा विशेष सत्कार करण्यात आला. युवासेना शहर अधिकारी पार्थ जागुष्टे आणि जिल्हा सोशल मीडिया प्रमुख सचिन चोरगे यांच्या उपस्थितीत उपशहर अधिकारी आकाश कदम यांच्या हस्ते चिले यांचा सन्मान करण्यात आला.
या सत्कार सोहळ्याच्या वेळी विभाग अधिकारी राहुल गुरव, शिवसैनिक मनिष कोलगे, वेदांत शितप, रेल्वे पोलीस उपनिरीक्षक दुदुमकर, चिपळूण तालुका पथक समादेशक अधिकारी तुषार मिस्त्री, जीआरपी पोलीस खांडेकर, होमगार्ड ओंकार पवार, राज चिले आणि सर्जेराव मोलावडे यांच्यासह इतर मान्यवर उपस्थित होते. रेल्वे प्रवाशांनी धावत्या गाडीत चढणे किंवा उतरणे टाळावे आणि सुरक्षित प्रवासाला प्राधान्य द्यावे, असे आवाहनही या प्रसंगी पोलीस व रेल्वे प्रशासनाकडून करण्यात आले.
