गणेशोत्सवाच्या पार्श्वभूमीवर प्रशासनाचा महत्त्वपूर्ण निर्णय; ६ ऑक्टोबर रोजी उघडल्या जाणार निविदा
शासकीय तंत्रनिकेतन कॅन्टीन निविदा मुदतवाढ संदर्भात रत्नागिरीतील इच्छुकांसाठी दिलासादायक बातमी समोर आली आहे. शासकीय तंत्रनिकेतन, रत्नागिरी येथील विद्यार्थी ग्राहक भंडार संचलित उपहार गृह (कॅन्टीन) चालविण्याकरिता प्रसिद्ध करण्यात आलेल्या निविदेला मुदतवाढ देण्याचा निर्णय घेण्यात आला आहे. गणेशोत्सवाच्या काळात आलेल्या अडचणी लक्षात घेता इच्छिकांना पुरेसा वेळ मिळावा, या उद्देशाने प्रशासनाने ३० सप्टेंबरपर्यंत अर्ज विक्रीची मुदत वाढवली आहे.
कॅन्टीन चालविण्याच्या निविदेची विक्री करण्याची मूळ अंतिम तारीख १९ सप्टेंबर निश्चित करण्यात आली होती. मात्र सध्या सुरू असलेल्या गणेशोत्सवामुळे अनेक इच्छुकांना वेळेत अर्ज घेणे आणि निविदा सादर करणे शक्य झाले नव्हते. सर्व पात्र व इच्छुक उमेदवारांना समान संधी मिळावी म्हणून निविदा विक्रीची तारीख आता ३० सप्टेंबरपर्यंत वाढविण्यात आली आहे.
सुधारित वेळापत्रकानुसार आता ३० सप्टेंबरपर्यंत निविदा अर्जांची विक्री केली जाणार असून, ३ ऑक्टोबरपर्यंत भरलेल्या निविदा जमा करता येणार आहेत. त्यानंतर विहित मुदतीत प्राप्त झालेल्या सर्व निविदा ६ ऑक्टोबर रोजी उपस्थित निविदाकार किंवा त्यांच्या अधिकृत प्रतिनिधींसमक्ष उघडल्या जातील, अशी अधिकृत माहिती शासकीय तंत्रनिकेतनच्या प्रभारी प्राचार्यांनी प्रसिद्धीपत्रकाद्वारे दिली आहे.
