मच्छी खरेदी करण्याच्या वादातून बापा-लेकाची हिंमत; ‘मर्डर करतो’ अशी धमकी देत बेदम मारहाण
रत्नागिरी : रत्नागिरी शहरातील मिरकरवाडा जेटीवर मच्छी खरेदी करण्याच्या वादातून एका मच्छिमार सप्लायरवर लोखंडी फायटर आणि चाकूने प्राणघातक हल्ला करण्यात आल्याची खळबळजनक घटना घडली आहे. “येथे मच्छी खरेदी करण्याची डेरिंग कशी केलीस, तुझा मर्डर करतो” अशी धमकी देत दोघांनी मिळून सप्लायरला बेदम मारहाण करून गंभीर जखमी केले. याप्रकरणी जखमी सप्लायरने दिलेल्या फिर्यादीवरून रत्नागिरी शहर पोलीस ठाण्यात बापा-लेकाविरुद्ध भारतीय न्याय संहितेनुसार गंभीर स्वरूपाचा गुन्हा दाखल करण्यात आला आहे.
मच्छी खरेदी करत असताना केला हल्ला :
पोलिसांकडून मिळालेल्या माहितीनुसार, शिवाजी नगर येथील रहिवासी व मच्छिमार सप्लायर रज्जाक हमजा साब (वय ४३ वर्षे) हे शनिवार, दिनांक ३ ऑक्टोबर २०२६ रोजी रात्री ८:३० वाजण्याच्या सुमारास मिरकरवाडा जेटीवर मच्छी खरेदी करत होते. त्यावेळी तेथे स्थानिक रहिवासी असलेले शफिक दर्वे आणि त्यांचा मुलगा अब्दुल्ला दर्वे हे दोघे आले. त्यांनी रज्जाक साब यांना “तुला आधी सांगितले होते ना, तू मिरकरवाडा येथे मच्छी खरेदी करण्याची डेरिंग कशी केलीस, तुझा आता मर्डर करतो” असे म्हणत थेट वाद घालण्यास सुरुवात केली.
लोखंडी फायटरने मारहाण अन् चाकूने वार :
वाद वाढताच आरोपी शफिक दर्वे याने रज्जाक साब यांना पाठीमागून घट्ट धरून ठेवले, तर मुलगा अब्दुल्ला दर्वे याने आपल्या हातातील लोखंडी फायटरने साब यांच्या डोक्यात, चेहऱ्यावर, छातीवर आणि पाठीवर जोरदार प्रहार करून त्यांना रक्तबंबाळ केले. एवढ्यावरच न थांबता, शफिक दर्वे याने आपल्या पॅन्टमधून धारदार चाकू काढून त्यांच्या दिशेने उगारला. स्वतःचा बचाव करण्यासाठी साब यांनी त्याचा हात धरण्याचा प्रयत्न केला असता, तो चाकू थेट त्यांच्या कपाळावर लागल्याने गंभीर दुखापत होऊन रक्त वाहू लागले.
जखमीवर जिल्हा शासकीय रुग्णालयात उपचार :
हा भीषण प्रकार घडत असताना जेटीवरील प्रत्यक्षदर्शी साक्षीदार आणि स्थानिक नागरिकांनी तात्काळ मध्यस्थी करून हल्लेखोरांच्या तावडीतून रज्जाक साब यांची सुटका केली. त्यानंतर त्यांना तातडीने उपचारासाठी रत्नागिरीच्या जिल्हा शासकीय रुग्णालयात (सिव्हिल हॉस्पिटल) दाखल करण्यात आले.
दोघा आरोपींविरुद्ध गुन्हा दाखल; पोलीस तपास सुरू :
हॉस्पिटलमध्ये प्राथमिक उपचार घेतल्यानंतर रज्जाक साब यांनी शहर पोलीस ठाण्यात फिर्याद दिली. त्यानुसार पोलिसांनी मध्यरात्री १) शफिक महमद शरीफ दर्वे (वय ४५ वर्षे) आणि २) अब्दुल्ला शफिक दर्वे (वय २२ वर्षे, दोघे रा. मिरकरवाडा, रत्नागिरी) या दोघांविरुद्ध गु.र.नं. ३८३/२०२६, भारतीय न्याय संहिता (BNS) २०२३ चे कलम ११८(१), ३५१(३), ३(५) (माजी भा.दं.वि. कलम ३२४, ५०६, ३४) अन्वये गुन्हा नोंदवला आहे. भर बाजारात घडलेल्या या प्राणघातक हल्ल्याचा पुढील तपास रत्नागिरी शहर पोलीस करत आहेत.
