‘पक्षांतर्गत निवडणुका न घेणे ही गंभीर चूक’; सादिक अली केसचा दाखला देत कौल यांचा युक्तिवाद; सरन्यायाधीश सूर्यकांत यांच्या खंडपीठासमोर सुनावणी
नवी दिल्ली :
Supreme Court Shiv Sena Hearing News अंतर्गत सर्वोच्च न्यायालयात शिवसेना पक्षनाव आणि ‘धनुष्यबाण’ या निवडणूक चिन्हावरून सुरू असलेल्या प्रदीर्घ वादाची सरन्यायाधीश सूर्यकांत यांच्या नेतृत्वाखालील खंडपीठासमोर सुनावणी सुरू आहे. आजच्या सुनावणीदरम्यान एकनाथ शिंदे गटाची बाजू मांडताना ज्येष्ठ वकील नीरज कौल यांनी थेट उद्धव ठाकरे यांच्या पक्षांतर्गत कारभारावर बोट ठेवले.
पक्षांतर्गत निवडणुका न घेणे ही अत्यंत गंभीर चूक असून, त्यामुळे पक्षात लोकशाहीची तत्त्वे पायदळी तुडवली गेल्याचे कौल यांनी वारंवार कोर्टाच्या निदर्शनास आणून दिले.
नीरज कौल यांचा सर्वोच्च न्यायालयात महत्त्वाचा युक्तिवाद
१. पक्षांतर्गत लोकशाहीचा अभाव: “प्रत्येक राजकीय पक्षात पक्षांतर्गत निवडणुका झाल्याच पाहिजेत, हीच खरी पक्षांतर्गत लोकशाही आहे,” असा दावा करत कौल यांनी सांगितले की, “शिवसेनेने २०११ नंतर पक्षाचे सुधारित संविधान निवडणूक आयोगाकडे सादर केलेले नाही, तसेच नियमानुसार पक्षांतर्गत निवडणुकाही घेतलेल्या नाहीत”.
२. सादिक अली केसचा दाखला: सर्वोच्च न्यायालयाच्या ऐतिहासिक सादिक अली (Sadiq Ali Case) प्रकरणाचा संदर्भ देत नीरज कौल यांनी पक्षातील संघटनात्मक बहुमताबाबतचे विविध मुद्दे वाचून दाखवले.
३. निवडणूक आयोगाचा अधिकार: “पक्षाच्या संविधानात बदल करणे किंवा महत्त्वाच्या पदांवर नियुक्त्या करणे याबाबतची माहिती निवडणूक आयोगाला देणे बंधनकारक असते. ज्या पक्षांमध्ये अंतर्गत निवडणुका होत नाहीत, त्यांना आयोग नोटीस बजावत असतो. ही केवळ एकाच पक्षाला दिलेली नोटीस नाही,” असे कौल म्हणाले.
४. आमदारांचे अधिकार आणि ऐतिहासिक निर्णय: कौल यांनी हरियाणातील एका ऐतिहासिक प्रकरणाचे उदाहरण देत, पक्षांतर्गत वाद निर्माण झाल्यास आणि पक्षाच्या मूळ चौकटीचे उल्लंघन झाल्यास लोकप्रतिनिधींचे (आमदारांचे) अधिकार आणि सदस्यत्व कसे कायम राहिले, हे स्पष्ट केले.
गेम पालटणार का? कायदेशीर वर्तुळात चर्चा
कालच्या सुनावणीदरम्यान न्यायमूर्ती जॉयमाल्या बागची आणि खंडपीठाने शिंदे गटाला काही प्रश्न विचारले होते. त्यावर आज वकील नीरज कौल यांनी ठाकरे गटाच्या पक्षांतर्गत निवडणुका न घेण्याच्या आणि मनमानी कारभाराच्या मुद्द्यावरून आक्रमक बचाव केला.
शिवसेना पक्ष आणि धनुष्यबाण चिन्हाची ही लढाई आता निर्णायक टप्प्यात पोहोचली असून, कौल यांच्या या युक्तिवादाने आणि ‘सादिक अली’ केसच्या उल्लेखाने या खटल्याचे चित्र बदलणार का, याकडे संपूर्ण देशाचे आणि महाराष्ट्राच्या राजकीय वर्तुळाचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
04:13 07-10-2026
