ग्रामीण व शहरी भागांत पाणी जपून वापरण्याचे प्रशासनाचे आवाहन
Ratnagiri Drought Situation च्या पार्श्वभूमीवर कोकणातील रत्नागिरी जिल्ह्यात यंदा पावसाने दगा दिल्यामुळे गंभीर दुष्काळी परिस्थिती निर्माण झाली आहे. पावसातील मोठ्या घटीमुळे जिल्ह्यातील सहा तालुक्यांमध्ये प्रशासनाकडून अधिकृतपणे दुष्काळ जाहीर करण्यात आला आहे. पावसाअभावी आणि वाढत्या तापमानामुळे काजळी व जगबुडी नद्या वगळता जिल्ह्यातील इतर सर्व प्रमुख नद्यांच्या पाणीपातळीत आतापर्यंत ८ टक्क्यांनी घट झाली आहे. गतवर्षी याच कालावधीत जिल्ह्यातील धरणांमध्ये ८३ टक्के पाणीसाठा उपलब्ध होता, तो यंदा घसरून ७५ टक्क्यांवर खाली आला आहे. हीच परिस्थिती कायम राहिल्यास ऐन उन्हाळ्यात भीषण पाणीटंचाई उद्भवण्याची शक्यता असल्याने रत्नागिरी शहर व ग्रामीण भागातील नागरिकांना पाणी अत्यंत जपून वापरण्याचे आवाहन करण्यात आले आहे.
एल निनोच्या प्रभावामुळे पाऊस घटला; धरण साठ्यात मोठी घसरण
दरवर्षी सरासरी साडेतीन हजार मिलीमीटरपेक्षा जास्त पाऊस पडणाऱ्या रत्नागिरी जिल्ह्यात यंदा एल निनोच्या प्रभावामुळे पावसाचे प्रमाण लक्षणीयरीत्या घटले आहे. जून आणि जुलै महिना वगळता ऑगस्ट व सप्टेंबर महिन्यात पावसाने प्रदीर्घ विश्रांती घेतल्याने यंदा अवघा २,४३७ मिलीमीटर म्हणजेच ७२ टक्के पाऊस नोंदवला गेला आहे. गतवर्षी वार्षिक सरासरीच्या ९० टक्के पाऊस झाला होता आणि मे महिन्याच्या दुसऱ्या आठवड्यापासूनच जोरदार पावसाला सुरुवात झाली होती. तसेच गेल्या वर्षी सप्टेंबर-ऑक्टोबरमध्ये पूरपरिस्थिती निर्माण होऊन धरणांमध्ये ८३ टक्के साठा जमा झाला होता. यंदा ९५ टक्क्यांहून अधिक पावसाचा अंदाज वर्तवला गेला असतानाही परतीचा पाऊस न पडल्याने धरणातील साठा ७५ टक्क्यांपर्यंत खाली आला आहे.
वाढत्या तापमानामुळे तीन प्रमुख नद्यांची पातळी १ मीटरपेक्षा खाली
पावसाळ्यातच उन्हाचा चटका जाणवू लागल्याने जिल्ह्याचे तापमान तब्बल ४० अंशांपर्यंत पोहोचले होते. या कडक उन्हामुळे जिल्ह्यातील नद्यांचे पाणी वेगाने सुकत चालले आहे. जिल्ह्यात वाहणाऱ्या आठ प्रमुख नद्यांपैकी काजळी, जगबुडी, बावनदी, वशिष्ठी आणि कोदवली या नद्या वगळता शास्त्री, सोनवी आणि मुचकुंदी या तीन महत्त्वाच्या नद्यांची पाणीपातळी १ मीटरपेक्षाही खाली घसरली आहे. नद्यांची पाणीपातळी अशीच खालावत राहिल्यास आगामी उन्हाळ्यात संपूर्ण कोकण किनारपट्टीला तीव्र पाणीटंचाईचा सामना करावा लागण्याची चिन्हे आहेत.
