सप्तलिंगी नदी परिषदेत ५१ जलप्रेमींचा सहभाग; पाणलोट क्षेत्रातील गावांत ५ सदस्यीय समित्या स्थापन करून जलसंधारणाचा महत्त्वाचा संकल्प
Drought mitigation action plan च्या अंतर्गत सप्तलिंगी नदीचे पुनरुज्जीवन आणि संभाव्य दुष्काळावर मात करण्याच्या उद्देशाने आयोजित तिसरी सप्तलिंगी नदी परिषद देवरुख येथील मराठा भवनमध्ये अतिशय उत्साहात पार पडली. या महत्त्वपूर्ण परिषदेला ५१ जलप्रेमींनी उपस्थित राहून आपला सहभाग नोंदवला. नियोजित सभागृहात ऐनवेळी बदल करावा लागल्यामुळे काही नागरिकांना परत जावे लागले असले, तरीही उपस्थित नागरिकांच्या सक्रिय सहभागातून ही परिषद अत्यंत सुरळीत पार पडली. या वेळी जलसाक्षर समिती महाराष्ट्र राज्याचे जलयोद्धा शहनवाज शाह, जलप्रेमी युयुत्सू आर्तें, सोळजाई ग्रामदैवताचे अध्यक्ष बापू गांधी, देवरुख महाविद्यालयाचे उपप्राचार्य सरदार पाटील आणि साडवलीचे प्रकाश डोंगरे यांनी उपस्थित मार्गदर्शन केले.
जलसंधारणाचे अनुभव आणि प्राथमिक आराखडा
परिषदेदरम्यान प्रत्येक गावातील प्रतिनिधींनी आपल्या भागातील पाणी समस्या व जलसंधारणाशी संबंधित आपले अनुभव उपस्थितांसमोर मांडले. या चर्चांमधून उपस्थितांसमोर आगामी काळात राबवण्यासाठी जलसंधारणाचा एक प्राथमिक कृती आराखडा निश्चित करण्यात आला. नदीकाठावरील १९ गावांसह संपूर्ण सप्तलिंगी पाणलोट क्षेत्रातील सहभागी होऊ इच्छिणाऱ्या प्रत्येक गावात पाच सदस्यांची विशेष समिती स्थापन करण्यात येणार आहे. सप्तलिंगी नदीकाठावरील ज्या गावांना वनराई बंधारे उभारायचे आहेत, त्यांनी तातडीने सप्तलिंगी नदी परिषदेकडे संपर्क साधावा, असे आवाहन करण्यात आले आहे. नदीवरील पाणी उपलब्ध व्हावे व गावातील पाण्याच्या पातळीत वाढ व्हावी, यासाठी आवश्यकतेनुसार जलतारा खड्डे करण्याचे नियोजन करण्यासाठी ग्रामपंचायतीने अधिकृत लेटरहेडवर मागणीपत्र किंवा प्रस्ताव देणे बंधनकारक असेल. परिषदेत ठरलेल्या नियोजनानुसार, २४ तासांच्या आत मंजुरी मिळवून प्रत्यक्ष काम सुरू करण्यासाठी प्राधान्याने प्रयत्न केले जाणार आहेत.
मारळ येथे बंधारा उभारणीचे नियोजन
मारळ येथील माळेश्वर देवस्थानच्या मागणीनुसार ३० ऑक्टोबर रोजी सकाळी ८ वाजता देवस्थानच्या पायथ्याशी व पार्किंगजवळील नदीपात्रात नवीन बंधारा उभारण्याचे काम सुरू करण्याचे ठोस नियोजन ठरवण्यात आले आहे. बंधाऱ्याच्या या मागणीच्या अनुषंगाने वनविभागाच्या प्रांगणासोबत जागेची प्रत्यक्ष पाहणी करून पुढील कायदेशीर कार्यवाही पूर्ण केली जाईल. तसेच, प्रत्येक गावातील नैसर्गिक जलस्रोत, दुर्लक्षित विहिरी व तळी शोधून त्यांची सविस्तर माहिती परिषदेकडे सादर केली जाणार आहे. ग्रामपंचायत, ग्रामदैवत देवस्थान, शिवलिंग देवस्थानाचे पदाधिकारी व ग्रामस्थ यांना एकाच मंचावर आणून बैठका घेणे आणि गावनिहाय जलसंधारण कृती आराखडा तयार करण्याचा निर्णय या वेळी घेण्यात आला. या विशेष परिषदेत उगाव येथील शेतकऱ्यांनी आणलेल्या सप्तलिंगी लाल भाताचे मुहूर्तपूजन करण्यात आले.
एकजुटीतून दुष्काळ निवारण्याचा निर्धार
सप्तलिंगी नदीचे संवर्धन, धार्मिक पर्यटनाचा विकास आणि जलसंधारणाच्या प्रभावी माध्यमातून संभाव्य दुष्काळाचा यशस्वी सामना करण्यासाठी सर्वांनी एकत्र येण्याचे आवाहन या वेळी करण्यात आले. गावागावांत जलसंधारणाची प्रत्यक्ष कामे उभी करून एकजुटीने दुष्काळावर मात करण्याचा दृढ निर्धार व्यक्त करत ही परिषद संपन्न झाली. या परिषदेला नगराध्यक्ष मृणाल शेट्ये, माजी उपनगराध्यक्ष अभिजीत शेट्ये, नगरसेवक रुपेश भागवत, माजी सभापती संतोष लाड यांच्यासह विविध गावांचे सरपंच, देवस्थानांचे पदाधिकारी, जलदूत, जलप्रेमी व मोठ्या संख्येने ग्रामस्थ उपस्थित होते. कार्यक्रमाचे सूत्रसंचालन सुरेंद्र उर्फ भावेश शिंदे यांनी केले, तर आभारप्रदर्शन अध्यक्ष निखिल कोळवणकर यांनी मानले. परिषद यशस्वी करण्यासाठी सचिव अरुण बेर्डे, सहसचिव संदीप वेलहाळ, आकाश भोपळे, प्रभाकर मांगले आणि साई कामेरकर यांनी विशेष परिश्रम घेतले.
