उत्तर व मध्य भारतातून येणाऱ्या थंड वाऱ्यांमुळे राज्याच्या किमान तापमानात घट; पुढील काही दिवसांत गारवा आणखी वाढणार
Maharashtra Winter Weather Update च्या माहितीनुसार, महाराष्ट्रात हळूहळू थंडीचा प्रभाव वाढू लागला असून, किमान तापमानात घट होण्यास सुरुवात झाली आहे. रविवारी नाशिकच्या निफाडमध्ये सकाळी नीचांकी पारा ११.८ अंश सेल्सिअसपर्यंत खाली आला, तर यवतमाळचे किमान तापमान १२.४ अंश सेल्सिअसपर्यंत खाली नोंदवले गेले. आगामी चार ते पाच दिवसांत राज्याच्या काही भागांतील किमान तापमानात आणखी दोन ते तीन अंशांनी घट होण्याचा अंदाज हवामान विभागाने वर्तवला आहे.
भारतीय हवामानशास्त्र विभागाच्या अंदाजानुसार, महाराष्ट्र पुढील काही दिवस प्रामुख्याने कोरडे हवामान राहणार आहे. आकाश निरभ्र राहिल्यामुळे रात्रीच्या वेळी जमिनीकडील उष्णता वेगाने अवकाशात उत्सर्जित होते, ज्यामुळे पहाटेच्या वेळी तापमानात घट होते. तसेच उत्तर आणि मध्य भारतातून येणाऱ्या थंड वाऱ्यांचाही तापमानावर परिणाम होत असून उत्तर महाराष्ट्रात सकाळच्या वेळी गारवा वाढण्याची शक्यता आहे.
Maharashtra Winter Weather Update: शनिवारचे विविध शहरांमधील किमान तापमान
हवामान विभागातर्फे जाहीर करण्यात आलेल्या आकडेवारीनुसार, शनिवारचे राज्यातील विविध शहरांमधील किमान तापमान पुढीलप्रमाणे नोंदवले गेले:
मुंबई: २५.६ अंश सेल्सिअस
पुणे: १५.२ अंश सेल्सिअस (पुणे शहरात रविवारी एनडीए येथे १२.६, तर शिवाजीनगर येथे १५.२ अंश सेल्सिअस नोंदले गेले)
जळगाव: १४.२ अंश सेल्सिअस
कोल्हापूर: २०.६ अंश सेल्सिअस
महाबळेश्वर: १५.३ अंश सेल्सिअस
मालेगाव: १४.२ अंश सेल्सिअस
नाशिक: १४.२ अंश सेल्सिअस
सांगली: १९.५ अंश सेल्सिअस
सातारा: १६ अंश सेल्सिअस
सोलापूर: १९ अंश सेल्सिअस
छत्रपती संभाजीनगर: १७ अंश सेल्सिअस
परभणी: १८.१ अंश सेल्सिअस
अकोला: १८ अंश सेल्सिअस
अमरावती: १७.५ अंश सेल्सिअस
बुलढाणा: १९.२ अंश सेल्सिअस
ब्रह्मपुरी: १९ अंश सेल्सिअस
चंद्रपूर: १८.२ अंश सेल्सिअस
नागपूर: १६ अंश सेल्सिअस
वाशीम: १९.४ अंश सेल्सिअस
वर्धा: १६.९ अंश सेल्सिअस
लगेच तीव्र लाट नाही; डिसेंबरमध्ये तापमान कसे राहणार?
राज्यात थंडीची सुरुवात झाली असली, तरी लगेच तीव्र थंडीची लाट येण्याची शक्यता नाही. पुढील काही दिवसात पहाटेचा गारवा वाढेल, मात्र दुपारचे तापमान तुलनेने अधिक राहणार असल्यामुळे दिवस व रात्रीच्या तापमानात तफावत जाणवेल. राज्यातील काही शहरांत गुलाबी थंडी जाणवायला लागली असली तरी दिवाळीनंतर तापमानात आणखी घट होण्याची शक्यता हवामान तज्ज्ञांकडून व्यक्त करण्यात येत असून नोव्हेंबर अखेरीस नीचांकी तापमानाची नोंद होण्याची शक्यताही वर्तवली जात आहे. अल निनोच्या प्रभावामुळे डिसेंबरमध्ये नेहमीपेक्षा तापमान अधिक राहण्याची शक्यता वर्तवली जात असल्याने यावर्षी अतिदीव्र स्वरूपाची बोचरी थंडी जाणवण्याची शक्यता कमी असल्याचे हवामान तज्ज्ञांकडून सांगण्यात येत आहे.
