पहाटे ५ वाजल्यापासून तब्बल ५ तास आग धुमसतीच; २० ते २५ अग्निशामक बंब दाखल, कोट्यवधींचे नुकसान
रत्नागिरी : रत्नागिरी शहरात आज भाऊबीजेच्या मंगल दिवशी पहाटे लागलेल्या भीषण आगीने केवळ कोट्यवधींचे आर्थिक नुकसानच केले नाही, तर २९ वर्षांपूर्वीच्या एका अत्यंत दुःखद आणि भीषण आठवणीला पुन्हा उजाळा दिला आहे. भाऊ-बहिणीच्या अतूट नात्याचा उत्सव साजरा करणाऱ्या सणांच्या दिवशीच रत्नागिरीच्या बाजारपेठेला आगीचा मोठा फटका बसण्याचा एक अत्यंत दुर्दैवी योगायोग आजच्या घटनेने समोर आणला आहे. १९९७ मध्ये रक्षाबंधनाच्या दिवशी घडलेल्या अग्नितांडवानंतर आता २०२६ च्या भाऊबीजेला शहराने पुन्हा एकदा आगीचे रौद्र रूप अनुभवले आहे.
१९९७ चे रक्षाबंधन अन् २०२६ ची भाऊबीज : एक दुर्दैवी योगायोग!
हिंदू संस्कृतीमध्ये बहीण-भावाचे पवित्र नाते साजरे करणारे रक्षाबंधन आणि भाऊबीज हे दोन अत्यंत महत्त्वाचे व आनंदाचे सण मानले जातात. मात्र, रत्नागिरी शहराच्या व्यापारी वर्गासाठी या दोन्ही सणांचे दिवस आगीच्या रूपाने काळा दिवस ठरले आहेत.
१९९७ चे रक्षाबंधन : १९९७ साली रक्षाबंधनाच्या दिवशी रत्नागिरी बाजारपेठेतील राम आळी, राधाकृष्ण नाका परिसरातील ५ ते ६ दुकानांना अचानक अशीच भीषण आग लागली होती. त्या दुर्घटनेत व्यापाऱ्यांचे प्रचंड नुकसान झाले होते.
२०२६ ची भाऊबीज : बरोबर २९ वर्षांनंतर आज, ११ नोव्हेंबर २०२६ रोजी भाऊबीजेच्याच पहाटे ५ वाजता के. सी. जैन नगर येथील ‘महालक्ष्मी मिनी मॉल’ आणि लगतच्या दुकानांना भीषण आग लागली. या दोन्ही दुर्घटनांमध्ये व्यापारी वर्गाचे कोट्यवधी रुपयांचे नुकसान झाल्याने संपूर्ण शहरात हळहळ व्यक्त केली जात आहे.
तब्बल ५ तासांनंतरही आग धुमसतीच; २० ते २५ बंब दाखल :
पहाटे ५ वाजता भडकलेली ही आग तब्बल ५ तासांचा कालावधी उलटून गेला तरी अद्याप पूर्णपणे नियंत्रणात आलेली नाही. आगीची तीव्रता इतकी प्रचंड आहे की, घटनास्थळी रत्नागिरीसह आसपासच्या परिसरातील तब्बल २० ते २५ अग्निशामक बंब दाखल झाले आहेत. जवानांकडून सातत्याने पाण्याचा मारा सुरू असूनही इमारतीतील आगीचे लोट अजूनही धुमसत आहेत.
व्यापाऱ्यांचे कोट्यवधींचे नुकसान; स्थानिक नागरिकांची मदत :
या आगीत महालक्ष्मी मिनी मॉलमधील संपूर्ण साहित्यासह आजूबाजूच्या व्यावसायिक गाळ्यांचे आणि कार्यालयांचे प्रचंड नुकसान झाले आहे. सणाच्या दिवशीच व्यापाऱ्यांवर हे मोठे संकट कोसळले आहे. दरम्यान, संकटसमयी शेकडो स्थानिक नागरिक मदतीसाठी धावून आले असून, उर्वरित माल सुरक्षित ठिकाणी हलवण्यासाठी आणि जवानांना मदत करण्यासाठी सर्वजण शर्थीचे प्रयत्न करत आहेत.
