वाहतुकीस अडथळा व अपघाताचा धोका निर्माण केल्याप्रकरणी कारवाई
रत्नागिरी: मुंबई-गोवा महामार्गावरील रत्नागिरी शहरालगतच्या कुवारबाव, कांचन हॉटेल ते आरटीओ नाका या परिसरात वाहतुकीच्या नियमांचे उल्लंघन करत विरुद्ध दिशेने (Wrong Side) दुचाकी चालवणाऱ्यांवर रत्नागिरी ग्रामीण पोलिसांनी धडक कारवाई केली आहे. रविवारी (दि. १५) सायंकाळी वेगवेगळ्या वेळेत या घटना घडल्या असून, महामार्गावरील वाहतुकीस अडथळा निर्माण करणे आणि अपघाताचा धोका वाढवणे या कारणावरून ग्रामीण पोलीस ठाण्यात संबंधित दुचाकीस्वारांविरुद्ध गुन्हे दाखल करण्यात आले आहेत.
कुवारबाव ते आरटीओ नाका दरम्यान एकाच सायंकाळी तीन घटना
रत्नागिरी ग्रामीण पोलिसांनी दिलेल्या माहितीनुसार, रविवारी सायंकाळी सव्वा सहाच्या सुमारास अजय मनाई भाई (वय ६०, रा. गणेश कॉलनी, टीआरपी, रत्नागिरी) हे आपल्या ताब्यातील दुचाकी कुवारबाव येथील महामार्गावरून विरुद्ध दिशेने चालवत असल्याचे आढळून आले. त्यानंतर अवघ्या पंधरा मिनिटांनी, साडेसहाच्या सुमारास चिंतन भरण पटेल (वय २४, रा. टीआरपी, रत्नागिरी) हे देखील महामार्गावरून विरुद्ध दिशेने दुचाकी चालवत असल्याचे पोलिसांच्या निदर्शनास आले. यामुळे महामार्गावरून वेगाने जाणाऱ्या इतर वाहनांना मोठा अडथळा निर्माण होऊन अपघाताचा धोका उद्भवण्याची शक्यता होती.
पोलीस कर्मचाऱ्यांच्या तक्रारीवरून ग्रामीण ठाण्यात गुन्हा नोंद
याच सायंकाळी कांचन हॉटेल ते आरटीओ नाका दरम्यान अब्बास बादशहा पठाण (वय ५९, रा. पानवल, जुगाईनगर, रत्नागिरी) हे देखील महामार्गावर विरुद्ध दिशेने दुचाकी चालवत असताना पोलिसांना आढळून आले. महामार्गावरील सुरक्षित वाहतुकीला बाधा आणणाऱ्या या कृत्याची पोलिसांनी गंभीर दखल घेतली. याप्रकरणी पोलीस हेड कॉन्स्टेबल प्रविण पाटील आणि बाजिराव कदम यांनी रत्नागिरी ग्रामीण पोलीस ठाण्यात रीतसर तक्रार दाखल केली. या तक्रारीवरून पोलिसांनी अजय भाई, चिंतन पटेल आणि अब्बास पठाण या तिन्ही दुचाकीस्वारांविरुद्ध गुन्हे दाखल केले असून, या कारवाईमुळे महामार्गावर बेशिस्तपणे वाहने चालवणाऱ्यांचे धाबे दणाणले आहेत.














