Rajapur News: बारसू परिसरातून २७ वर्षीय रिक्षाचालक तरुण बेपत्ता; अपहरणाचा संशय व्यक्त करत पोलिसांत गुन्हा दाखल

Rajapur News: बारसू परिसरातून २७ वर्षीय रिक्षाचालक तरुण बेपत्ता; अपहरणाचा संशय व्यक्त करत पोलिसांत गुन्हा दाखल

राजापूर पोलीस ठाण्यात फिर्याद; १४ नोव्हेंबरपासून तरुण गायब, पोलिसांकडून शोध सुरु

पाचल: राजापूर तालुक्यातील बारसू परिसरातून एक २७ वर्षीय तरुण रिक्षाचे भाडे घेऊन घराबाहेर पडल्यापासून रहस्यमय रीतीने बेपत्ता झाल्याची घटना घडली आहे. या तरुणाचे अज्ञात व्यक्तीने गुप्तपणे व गैरपणे डांबून ठेवण्याच्या उद्देशाने अपहरण केले असल्याचा संशय त्याच्या मामाने व्यक्त केला आहे. याप्रकरणी राजापूर पोलीस ठाण्यात अज्ञात आरोपीविरुद्ध भारतीय न्याय संहिता (BNS) कलम १४०(३) अन्वये गुन्हा दाखल करण्यात आला असून, परिसरात एकच चर्चा सुरू आहे.

रिक्षाचे भाडे घेऊन गेलेला तरुण घरी परतलाच नाही
बारसू खालचीवाडी (ता. राजापूर, जि. रत्नागिरी) येथील शेतकरी प्रभाकर सखाराम कदम (वय ६३) यांनी या प्रकरणी राजापूर पोलीस ठाण्यात फिर्याद दिली आहे. त्यांचा भाचा शुभम रवींद्र शिर्के (वय २७, रा. बारसू खालचीवाडी) हा तरुण रिक्षा चालवण्याचे काम करतो. पोलिसांना दिलेल्या माहितीनुसार, १४ नोव्हेंबर २०२६ रोजी सकाळी साडेसात वाजण्याच्या सुमारास शुभम हा आपल्या राहत्या घरातून रिक्षाचे भाडे घेऊन बाहेर पडला होता; परंतु त्यानंतर तो घरी परतलाच नाही.

कुटुंबीयांकडून शोध, अखेर पोलिसांत अपहरणाचा गुन्हा दाखल
कुटुंबीयांनी आणि नातेवाइकांनी आसपासच्या परिसरात तसेच संभाव्य ठिकाणी शुभमचा कसून शोध घेतला, परंतु तो कुठेही आढळून आला नाही. अखेर कोणीतरी अज्ञात इसमाने शुभम याला गुप्तपणे व गैरपणे डांबून ठेवण्याच्या (परिरुद्ध करण्याच्या) उद्देशाने त्याचे अपहरण केले असावे, असा संशय व्यक्त करत मामा प्रभाकर कदम यांनी १५ नोव्हेंबर २०२६ रोजी दुपारी राजापूर पोलीस ठाण्यात जाऊन अधिकृत तक्रार नोंदवली.

Bane School

या तक्रारीच्या आधारे पोलिसांनी गुन्हा रजिस्टर क्रमांक ३०२/२०२६ नुसार गुन्हा दाखल केला आहे. बेपत्ता रिक्षाचालक शुभम शिर्के आणि त्याचा शोध घेण्यासाठी राजापूर पोलिसांनी तातडीने तपास चक्रे गतिमान केली असून, पोलीस या प्रकरणाचा सखोल शोध घेत आहेत.