चिपळूण : भूकंप पुनर्वसन योजनेंतर्गत चिपळूण आणि संगमेश्वर तालुक्यांसाठी १८ कोटींचा विशेष निधी मंजूर करण्यात आला आहे. आमदार शेखर निकम यांच्या सातत्यपूर्ण पाठपुराव्याला यश मिळाले आहे. प्रशासकीय मान्यतासुद्धा प्राप्त झाली आहे.
या निधीतून बाधित झालेले रस्ते, इमारती, संरक्षण भिंती, समाजमंदिरे आणि इतर सार्वजनिक सुविधा यांची सुधारणा केली जाणार आहे. त्यामुळे या भागातील नागरिकांना मोठा दिलासा मिळणार आहे.
आमदार शेखर निकम यांनी सामान्य नागरिकांच्या मूलभूत गरजा पूर्ण करण्यासाठी नेहमीच प्राधान्य दिले आहे. भूकंपग्रस्त भागातील पुनर्वसन आणि पुनर्बाधणीच्या कामांसाठी त्यांनी वेळोवेळी शासनाकडे पाठपुरावा केला. त्यांच्या सातत्यपूर्ण प्रयत्नांमुळे अखेर १८ कोटींचा निधी मंजूर करण्यात आला.
जनतेच्या समस्या सोडवणे आणि त्यांना मूलभूत सुविधा मिळवून देणे, हे माझे कर्तव्य आहे. हा निधी मंजूर होणे म्हणजे जनतेच्या विश्वासाला दिलेला न्याय आहे, असे आ. निकम यांनी सांगितले.
या निधीतून सार्वजनिक इमारतींचे नूतनीकरण आणि आवश्यक तेथे नव्याने उभारणी, पूर आणि भूस्खलन यांसारख्या आपत्तींना तोंड देण्यासाठी संरक्षण भिंती उभारण्यात येतील. ग्रामस्थांसाठी महत्त्वाची ठिकाणे सुशोभित आणि सुरक्षित केली जाणार आहेत. निधी मंजुरीच्या घोषणेनंतर चिपळूण आणि संगमेश्वर तालुक्यातील नागरिकांमध्ये समाधानाचे वातावरण निर्माण झाले आहे.
गावांचे पुनर्निर्माण आणि दैनंदिन जीवनमान उंचावण्यासाठी हा निधी मोठी मदत करणार असल्याचे ग्रामस्थांनी सांगितले. आमदार शेखर निकम यांनी जनतेला दिलेला शब्द पाळला. त्यांच्या अथक प्रयत्नांमुळेच हा निधी मंजूर झाला आहे, असे स्थानिक नागरिकांनी कृतज्ञता व्यक्त करताना सांगितले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:47 AM 27/Mar/2025
