रत्नागिरी : ग्रामीण रुग्णालय पाली येथे राष्ट्रीय आरोग्य अभियान आणि एच.एल.एल. लाईफ केअर लिमिटेड यांच्या संयुक्त विद्यमाने महाडायलिसिस सेंटर चे लोकार्पण नुकतेच पार पडले. या प्रसंगी जिल्हा शल्य चिकित्सक डॉ. भास्कर जगताप यांनी किडनीच्या आरोग्यासाठी व्यसनांवर नियंत्रण ठेवण्याचे आवाहन केले. त्यांनी सांगितले की, बदलती जीवनशैली आणि हानीकारक व्यसने मूत्रपिंड निकामी होण्याचे प्रमुख कारण आहेत. व्यसनांवर आळा घातल्यास किडनी निरोगी ठेवता येऊ शकते.
मूत्रपिंड आणि डायलिसिसची गरज
डॉ. जगताप यांनी सांगितले की, मूत्रपिंड निकामी झाल्यास रक्तातील कचरा आणि अतिरिक्त द्रवपदार्थ बाहेर काढण्यासाठी डायलिसिस करावी लागते. मूत्रपिंड योग्यरित्या कार्य न केल्यास रक्तातील विषारी पदार्थ वाढतात, ज्यामुळे गंभीर आरोग्य समस्या उद्भवू शकतात. वैद्यकीय अधीक्षक डॉ. विकास कुमरे यांनी सांगितले की, मूत्रपिंडाचे कार्य कमी झाल्यास किंवा पूर्ण थांबल्यास डायलिसिस आवश्यक ठरते. यामध्ये हेमोडायलिसिस (रक्त बाहेर काढून फिल्टर करणे) आणि पेरिटोनियल डायलिसिस (पोटात द्रव भरून कचरा शोषून घेणे) हे दोन प्रकार आहेत.
लोकार्पण सोहळा
या सोहळ्याला जेष्ठ उद्योजक रविंद्र सामंत, मूत्रपिंडविकार तज्ज्ञ डॉ. अमेय बेडेकर, डॉ. विनोद कानगुले, पाली ग्रामीण रुग्णालयाचे वैद्यकीय अधिकारी डॉ. सचिन साळुंखे, माजी सरपंच रामभाऊ गराटे, शिवसेना पाली जि.प. गटाचे विभागप्रमुख सचिन सावंत, तसेच एच.एल.एल. जिल्हा समन्वयक दुर्वेश खाके यांच्यासह स्थानिक नागरिक आणि रुग्ण उपस्थित होते. रविंद्र सामंत यांनी डायलिसिस विभागाला शुभेच्छा देत रुग्णसेवेसाठी चांगली कामगिरी करण्याचे आवाहन केले.
सामाजिक उपक्रम
या महाडायलिसिस सेंटरमुळे पंचक्रोशीतील रुग्णांना मोठा दिलासा मिळणार आहे. सोहळ्याला डायलिसिसचे तंत्रज्ञ, कर्मचारी, रुग्ण आणि त्यांचे नातेवाईक, तसेच पाली ग्रामीण रुग्णालयाचे अधिकारी आणि कर्मचारी मोठ्या संख्येने उपस्थित होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:31 16-04-2025
