रत्नागिरी, १८ ऑगस्ट:
रत्नागिरी जिल्ह्यात पावसाचा जोर कायम असून, पूरस्थिती गंभीर बनली आहे. पाटबंधारे विभागाने दुपारी १२ वाजता जारी केलेल्या ताज्या अहवालानुसार, खेड येथील जगबुडी नदी अजूनही धोक्याच्या पातळीवरून वाहत असून, खेड शहरावरील पुराचा धोका कायम आहे. दिलासादायक बाब म्हणजे, संगमेश्वर येथील शास्त्री नदीची पातळी काही प्रमाणात घटल्याने नागरिकांना तात्पुरता दिलासा मिळाला आहे.
आज दुपारी १२ वाजताच्या अहवालानुसार, खेड-भरणे पुलाजवळ जगबुडी नदीची पाणी पातळी ७.४० मीटरवर स्थिर आहे. ही पातळी धोका दर्शक पातळीपेक्षा (७.०० मीटर) जास्त असल्याने नदीकाठच्या गावांना सतर्कतेचा उच्च इशारा देण्यात आला आहे.
दरम्यान, सकाळपासून इशारा पातळीच्या वर वाहणाऱ्या संगमेश्वर येथील शास्त्री नदीची पातळी आता ६.२० मीटरवर आली आहे. नदीची पातळी इशारा पातळीपर्यंत खाली आल्याने संगमेश्वरवासीयांना मोठा दिलासा मिळाला आहे. मात्र, धोका पूर्णपणे टळलेला नाही. याव्यतिरिक्त, राजापूर येथील कोदवली नदी ५.२० मीटरवरून वाहत असून, ती अजूनही इशारा पातळीच्या वर आहे.
चिपळूणमधील वाशिष्ठी आणि संगमेश्वरमधील बावनदीच्या पाणी पातळीत किंचित घट झाली असली, तरी जिल्ह्यातील पूरस्थिती गंभीर असून प्रशासनाने नागरिकांना सतर्क राहण्याचे आणि नदीपात्राजवळ न जाण्याचे आवाहन केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:19 18-08-2025
