रत्नागिरी:
जिल्ह्यासह संपूर्ण महाराष्ट्रात सुरू असलेल्या मुसळधार पावसाच्या पार्श्वभूमीवर, जिल्ह्याचे पालकमंत्री तथा राज्याचे उद्योगमंत्री उदय सामंत यांनी सोशल मीडियाच्या माध्यमातून एक संदेश प्रसिद्ध केला आहे. यात त्यांनी आपत्कालीन परिस्थितीत अहोरात्र काम करणाऱ्या सर्व यंत्रणांच्या कार्याला सलाम केला आहे, तर नागरिकांना गरजेशिवाय घराबाहेर न पडण्याचे कळकळीचे आवाहन केले आहे.
आपल्या संदेशात, मंत्री सामंत यांनी पोलीस, महानगरपालिका कर्मचारी, अग्निशमन दल, NDRF, SDRF जवान आणि विविध सेवाभावी संस्थांच्या कार्याचा विशेष गौरव केला. “या कठीण प्रसंगी आपण स्वतःच्या जीवाची पर्वा न करता मानवतेची सेवा करत आहात. पाऊस आपली परीक्षा पाहत आहे, पण आपल्या कार्याला माझा प्रणाम,” अशा शब्दांत त्यांनी आपल्या भावना व्यक्त केल्या.
यावेळी त्यांनी अत्यंत नम्रपणे मदतीचा हात पुढे करत एक भावनिक सादही घातली. “आपल्या कार्यासमोर मी अत्यंत क्षुल्लक आहे, पण तरीही काही मदत करू शकत असेन तर मला जरूर फोन करा. मी माझ्या अल्पशा क्षमतेनुसार आपल्या सोबत खंबीर उभा आहे,” असे म्हणत त्यांनी सर्व कर्मचाऱ्यांना वैयक्तिक पातळीवर मदतीचे आश्वासन दिले आहे.
शेवटी, त्यांनी जिल्ह्यातील नागरिकांना उद्देशून, “नागरिकांनी प्रशासनाच्या सूचनांचे काटेकोर पालन करावे. आवश्यकता व गरज असेल तरच घराबाहेर पडा,” असा महत्त्वाचा सल्ला देत सर्वांना सुरक्षित राहण्यास सांगितले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:52 19-08-2025
