खेड, रत्नागिरी: १५ ऑक्टोबर २०२५:
खेड तालुक्यात अल्पवयीन मुलीवर झालेल्या लैंगिक अत्याचाराच्या संतापजनक प्रकरणाचे तीव्र पडसाद उमटले आहेत. या प्रकरणी स्वयंघोषित भगवान कोकरे महाराज याला पोलिसांनी पोक्सो कायद्यांतर्गत अटक केल्यानंतर, आता ‘शिवसेना धर्मवीर आध्यात्मिक सेने’ने त्याच्यावर मोठी कारवाई करत त्याची संघटनेतून पदावरून हकालपट्टी केली आहे. या प्रकरणामुळे संपूर्ण जिल्ह्यात खळबळ उडाली असून, या कारवाईचे सर्व स्तरांतून स्वागत होत आहे.
काय आहे प्रकरण?
खेड तालुक्यात शिक्षणासाठी जवळ राहिलेल्या एका अल्पवयीन मुलीवर भगवान कोकरे महाराज आणि त्याचा सहकारी प्रीतेश प्रभाकर कदम यांनी लैंगिक अत्याचार केल्याचा आरोप आहे. पीडितेच्या कुटुंबीयांनी दिलेल्या तक्रारीनंतर खेड पोलिसांनी दोघांनाही अटक करून त्यांच्यावर भारतीय दंडसंहिता आणि पोक्सो अधिनियमांतर्गत गुन्हा दाखल केला. न्यायालयाने दोघांना दोन दिवसांची पोलिस कोठडी सुनावली असून, पोलीस या प्रकरणाचा अधिक तपास करत आहेत.
आध्यात्मिक सेनेची तात्काळ आणि कठोर कारवाई
हे गंभीर प्रकरण समोर येताच, ‘शिवसेना धर्मवीर आध्यात्मिक सेने’ने याची तातडीने दखल घेतली. संघटनेचे सचिव यांनी आज, १५ ऑक्टोबर रोजी एक प्रसिद्धीपत्रक जारी करून भगवान कोकरे याच्यावर कठोर कारवाईची घोषणा केली.
संघटनेने घेतलेले महत्त्वाचे निर्णय:
- श्री. भगवान कोकरे याची कोकण विभागाच्या समन्वयक पदावरून केलेली नियुक्ती तात्काळ रद्द करण्यात आली आहे.
- प्रकरणाची निष्पक्ष चौकशी होईपर्यंत त्याला संघटनेच्या कोणत्याही जबाबदारीच्या पदावर राहता येणार नाही.
- प्रसिद्धीपत्रकात म्हटले आहे की, “सदर प्रकरण केवळ संघटनेच्या प्रतिमेला धक्का देणारे नसून, नैतिक आणि सामाजिक दृष्ट्याही अतिशय लज्जास्पद आहे. चौकशीत दोषी आढळल्यास कोकरे याच्यावर संघटनेच्या आणि कायदेशीर स्तरावर सर्वात कठोर कारवाई केली जाईल.”
शिफारशींना थारा नाही, शिस्त महत्त्वाची
संघटनेने स्पष्ट केले आहे की, या प्रकरणात कोणताही राजकीय, वैयक्तिक किंवा सामाजिक दबाव किंवा शिफारस विचारात घेतली जाणार नाही. “संघटना शिस्त, पारदर्शकता आणि नैतिकतेवर उभी आहे. कुणीही या मूल्यांवर डाग आणण्याचा प्रयत्न केल्यास त्याला कोणतीही सूट दिली जाणार नाही,” असेही पत्रकात ठामपणे नमूद करण्यात आले आहे.
या प्रकरणात अफवा न पसरवता सर्वांनी सत्य बाहेर येण्यासाठी सहकार्य करावे, असे आवाहनही संघटनेने केले आहे. एका बाजूला पोलीस तपास सुरू असताना, दुसरीकडे संबंधित संघटनेने घेतलेल्या या कठोर भूमिकेमुळे आरोपीचे पाय अधिकच खोलात गेले आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:27 15-10-2025
